Liquor Ban : सलग ४ दिवस दारूचे दुकान बंद राहणार; निवडणुकीच्या पार्श्वभूमीवर आयोगाचा मोठा निर्णय

पश्चिम बंगालमध्ये विधानसभा निवडणुकीसाठी पहिल्या टप्प्याचं मतदान २३ एप्रिल रोजी होणार आहे. निवडणुकीच्या पार्श्वभूमीवर सलग 4 दिवस दारूचे दुकान बंद ठेवण्यात येणार आहे. निवडणुकीच्या काळात दारू विक्रीचे प्रमाण वाढते. त्यामुळे दारूचे दुकाने बंद ठेवण्याचा निर्णय घेण्यात आलाय. मागील वर्षीच्या एप्रिल महिन्याच्या तुलनेत यंदा पश्चिम बंगालमध्ये दारूच्या विक्रीत असामान्य वाढ झाली आहे. या पार्श्वभूमीवर आयोगाने निवडणूक काळात २ ऐवजी ४ दिवस दारूचे दुकान बंद ठेवण्याचा आदेश दिला आहे.

निवडणूक आयोगाने म्हटलं की, 'मागील वर्षीच्या तुलनेत या वर्षीच्या एप्रिल महिन्यात डब्ल्यूबीएसबीसीएलच्या डेपोंमधून किरकोळ विक्रेत्यांच्या पॅकेज्ड दारू विक्रीत अचानक वाढ झाली आहे. तसेच दारूच्या दुकानातही वाढ झाली आहे'. आयोगाने पुढे म्हटलं की, 'मद्यपान देखरेख उपक्रम आणि इतर घटकांचे मूल्यांकन करण्यात आलं आहे. त्यानंतर मद्यविक्रीवरील बंदी वाढवण्याचा निर्णय घेण्यात आला.

यंदा तृणमूल काँग्रेसला भाजपचं आव्हान असणार आहे. पश्चिम बंगालमध्ये विधानसभा निवडणुका २९४ जागांसाठी मतदान होणार आहे. ही निवडणूक दोन टप्प्यात होणार आहे. तर पहिल्या टप्प्यात १५२ जागांसाठी गुरुवारी २३ एप्रिल रोजी मतदान होईल. तर दुसऱ्या टप्प्यासाठी २९ एप्रिल रोजी १४२ जागांसाठी मतदान होईल. या निवडणुकीचा निकाल ४ मे रोजी जाहीर केला जाईल.

मुख्य निवडणूक आयुक्त ज्ञानेश कुमार यांनी म्हटलं की, 'बंगालमध्ये निष्पक्ष, पारदर्शक निवडणुका पार पाडण्यासाठी यंत्रणा सज्ज आहे. तसेच कामात कोणतीही कसर सोडणार नाहीत'. निवडणूक आयोग भाजपला मदत करत असल्याचा आरोप तृणमूल काँग्रेसने केला आहे. परंतु निवडणूक आयागोने आरोप फेटाळून लावले आहेत.