Donald Trump : डोनाल्ड ट्रम्प यांची दुतोंडी भूमिका; भारतावर लावला ५० टक्के टॅरिफ अन् रशियाशी केली सीक्रेट डील

नवी दिल्ली : अमेरिकेचे राष्ट्राध्यक्ष डोनाल्ड ट्रम्प यांची दुतोंडी भूमिका जगासमोर आली आहे. ट्रम्प यांनी भारताच्या रशियाकडून तेल खरेदीवर आक्षेप घेतला. मात्र, अमेरिका रशियाशी एक करार करत असल्याची माहिती मिळत आहे. रशियाच्या तेल खरेदीवरून अमेरिकेने भारतावर दुप्पट टॅरिफ लागू केला. मात्र, डोनाल्ड ट्रम्प यांच्या या दुटप्पी धोरणाची सर्वत्र चर्चा होत आहे.

'वॉल स्ट्रीट जर्नल'च्या रिपोर्टनुसार, अमेरिका रशियाकडून ऊर्जा खरेदीसाठी करार करत आहे. रिपोर्टनुसार, अलास्कामध्ये अमेरिकेचे राष्ट्राध्यक्ष ट्रम्प आणि रशियाचे राष्ट्राध्यक्ष पुतिन यांच्यासोबत बैठक झाली. या बैठकीनंतर रशियाचे राष्ट्राध्यक्ष क्वादिमीर पुतिन यांनी माध्यमांशी संवाद साधला. त्यांनी म्हटलं की, 'रशिया आणि अमेरिका मिळून व्यापार करू शकतो'.

पुतिन यांच्यानंतर ट्रम्प म्हणाले की, 'आम्ही व्यापार करण्यासाठी उत्सुक आहोत'. परंतु दोन्ही नेत्यांनी सार्वजनिकरित्या करारविषयी बोलण्याचे टाळले. दोन्ही देशांच्या ऊर्जा कंपन्यांनी रशियाच्या सुदूर पूर्वेकडील किनाऱ्यावर असलेल्या तेल आणि वायू क्षेत्रांमधून तेल काढून परस्पर व्यापार पुन्हा सुरू करण्याची रूपरेषा आधीच तयार केली होती, या कराराविषयी बोलण्याचे टाळले.

अमेरिकेत सर्वात मोठी ऊर्जा कंपनी एक्सॉन मोबिलने रशियातील सरकारी तेल कंपनी रोसनेफ्टसोबत गुपीतपणे बोलणं सुरु केलं आहे. ही बोलणी डोनाल्ड ट्रम्प यांच्या मध्यस्थीने करण्यात आली आहे. त्यामुळे डोनाल्ड ट्रम्प यांची दुतोंडी भूमिका उघड झाली आहे.

अमेरिकेने २५ टक्के अधिकचा टॅरिफ भारतावर लागू केला आहे. भारतावर एकूण ५० टक्के टॅरिफ लागू केला आहे. यामुळे भारताच्या व्यापारावर परिणाम होणार आहे. ट्रम्प यांच्या निर्णयाचा भारतातील अब्जो डॉलरच्या व्यापारावर परिणाम होणार असल्याचे बोलले जात आहे. तसेच अमेरिकेचे राष्ट्राध्यक्ष डोनाल्ड ट्रम्प यांच्या या दुटप्पी धोरणामुळे भारताच्या अर्थव्यवस्थेला मोठा फटका बसण्याची शक्यता व्यक्त करण्यात येत आहे.