Crime: धनत्रयोदशीला भयंकर हत्याकांड! आश्रमात झोपलेल्या पुजाऱ्याची निर्घृण हत्या, बायकोच्या डोळ्यासमोर संपवलं

उत्तर प्रदेशच्या रायबरेलीमध्ये हत्याकांडाची भयंकर घटना समोर आली. धनत्रयोदशीच्या दिवशी मध्यरात्री एका अघोरी पुजाऱ्याची निर्घृण हत्या करण्यात आली. काही तरुणांनी आश्रमामध्ये घुसून धारधार शस्त्रांनी वार करत त्यांची हत्या केली. पुजारी झोपला होता त्याचवेळी त्यांच्यावर जीवघेणा हल्ला करण्यात आला. बायकोच्या डोळ्यासमोर आरोपींनी पुजाऱ्याला संपवलं. पुजाऱ्याच्या बायकोने आरोपींना थांबवण्याचा प्रयत्न केला पण आरोपी पुजाऱ्यावर वार करतच राहिले. या घटनेमुळे उत्तर प्रदेशमध्ये खळबळ उडाली आहे.

मिळालेल्या माहितीनुसार, मुर्तजानगर गावामध्ये असणाऱ्या एका आश्रमात पुजाऱ्याची मध्यरात्री उशिरा हत्या करण्यात आली. आश्रमात राहणारे पुजारी मोहन नाथ यांची हत्या करण्यात आली. आश्रमात घुसून धारधार शस्त्रांनी वार करत पुजाऱ्याला जागीच संपवलं. मोहन नाथ हे मूळचे शाहजहांपूर येथील रहिवासी होते. पण गेल्या २० वर्षांपासून ते मुर्तजानगर येथील गावामध्ये आश्रमात राहत होते. त्यांची बायको द्रौपदी पश्चिम बंगालची आहे. ती देखील पुजाऱ्यासोबत आश्रमात राहत होती.

मध्यरात्रीच्या सुमारास काही अज्ञात हल्लेखोरांनी आश्रमात प्रवेश केला आणि पुजाऱ्यासोबत वाद घातला. त्यानंतर त्यांच्यावर हल्ला करण्यास सुरुवात केली. त्यांची पत्नी द्रौपदी यांनी हस्तक्षेप करण्याचा प्रयत्न केला तेव्हा हल्लेखोरांनी घटनास्थळावरून पळ काढला. त्यानंतर पुजारी आणि त्याची पत्नी झोपी गेले. पहाटे ३ वाजताच्या सुमारास तेच हल्लेखोर आश्रमात परत आले. त्यांनी पुजारी मोहन नाथ अघोरी झोपेत असताना त्यांच्यावर धारदार शस्त्राने हल्ला केला. या हल्ल्यात त्यांचा जागीच मृत्यू झाला.

हल्ल्यादरम्यान पुजाऱ्याच्या पत्नीने आरडाओरडा केला. त्यानंतर हल्लेखोर पळून गेले. घटनेची माहिती मिळताच पोलिस घटनास्थळी पोहोचले. फॉरेन्सिक टीमने घटनास्थळावरून पुरावे गोळा केले आणि मृतदेह शवविच्छेदनासाठी रुग्णालयात पाठवला. अतिरिक्त पोलिस अधीक्षक संजीव सिन्हा यांनीही घटनेची घटनास्थळी पाहणी केली आणि स्थानिक पोलिसांना लवकरात लवकर प्रकरण सोडवण्याचे निर्देश दिले. पोलिसांनी प्राथमिक तपासात दोन संशयितांना ताब्यात घेतले आहे आणि त्यांची चौकशी सुरू आहे.