Political News : मोठी बातमी! भाजप खासदारावर जीवघेणा हल्ला, राजकीय वर्तुळात खळबळ

भाजप खासदार राजू बिस्ता यांच्यावर जीवघेणा हल्ला झाल्याची घटना घडली आहे. अज्ञातांनी दार्जिलिंगच्या खासदाराच्या ताफ्यावर दगडफेक करत हल्ला केला. खासदार राजू बिस्ता यांच्यावर हल्ला झाल्याने राजकीय वर्तुळात खळबळ उडाली आहे.

खासदार राजू बिस्ता यांनी सोशल मीडियावर पोस्ट करत हल्ल्याची माहिती दिली. त्यांनी कारवर केलेल्या हल्ल्याचे फोटो देखील शेअर केले आहेत. खासदार राजू बिस्ता यांच्यावर हल्ला झाल्याची माहिती मिळताच कार्यकर्ते मोठ्या प्रमाणात घटनास्थळी पोहोचले.

भाजप खासदार राजू बिस्ता यांनी सोशल मीडियावर पोस्ट करत म्हटलं की, 'आज पश्चिम बंगालच्या मसधुरा येथील सुखिया पोखरीजवळ माझ्या ताफ्यावर अज्ञातांनी हल्ला केला. मी बसलेल्या कारच्या मागच्या कारवर अज्ञातांनी दगडफेक करत हल्ला केला. मतदारसंघातील शांतता भंग करण्यासाठी हल्ला केल्याची शक्यता आहे'.

'कोलकातामधील लोक विचार करत असतील. आम्ही घाबरून जाऊ. परंतु आम्ही घाबरणारे नाहीत. लपून छपून हल्ला करणाऱ्यांमुळे आम्हाला आणखी लढण्याची शक्ती मिळते, असे ते म्हणाले.

भाजप खासदारांनी इशारा देताना म्हटलं की, 'ज्यांनी शांतता भंग करण्याचा प्रयत्न केला. त्यांचे मनसुबे आम्ही कधीच पूर्ण होऊ देणार नाही.आम्ही शांततेसाठी काम करत राहू. यासाठी जगातील कोणतीही ताकद आम्हाला रोखू शकणार नाही'.

काही दिवसांपूर्वी खासदार आणि आमदारावर झाला होता हल्ला

काही दिवसांपूर्वी उत्तर बंगालमधील पूरस्थितीचा आढवा करताना भाजप खासदार खगेन मुर्मू आणि आमदार शंकर घोष यांना स्थानिकांच्या रोषाचा सामना करावा लागला होता. शेकडो लोकांनी खगेन मुर्मू आणि शंकर घोष यांच्या लाठी आणि बुट फेकत पळवून लावलं होतं. काहींनी नदीपात्रातील दगड फेकून मारल्याचा आरोप त्यांनी केला होता.

या हल्ल्यात खगेन यांच्या चेहऱ्यावर जखम झाली होती. तर शंकर घोष यांच्या हाताला गंभीर जखम झाली होती. या हल्ल्यात जखमी झाल्यानंतर दोघांना तातडीने रुग्णालयात दाखल करण्यात आलं होतं. शंकर घोष यांच्यावर प्राथमिक उपचार करून सोडण्यात आलं होतं. तर खगेन मुर्मू यांच्यावर अजूनही उपचार सुरु असल्याची माहिती मिळत आहे.