ममता बॅनर्जी यांना मोठा धक्का; कोलकाताच्या महापौरांचा तडकाफडकी राजीनामा

पश्चिम बंगालमध्ये तृणमूल काँग्रेसच्या प्रमुख ममता बॅनर्जी यांच्या समोरील अडचणी दिवसेंदिवस वाढू लागल्या आहेत. राज्यात सत्ता परिवर्तन झाल्यानंतर भ्रष्टाचारात अडकलेल्या टीएमसी नेत्यांवर कारवाई होत आहे. टीएमसीच्या अनेक नेत्यांवर लोक हल्ले करताहेत. आतापर्यंत टीएमसीच्या अनेक नेत्यांनी पक्ष सोडला आहे. पश्चिम बंगाल विधानसभा निवडणुकीनंतर आता पक्षातही उभी फूट पडली आहे. टीएमसीच्या ६० आमदारांचा वेगळा गट स्थापन झाला आहे. त्यानंतर आता ममता बॅनर्जी यांच्या जवळचे नेते फिरदाद हकमी यांनी कोलकाताच्या महापौरपदाचा राजीनामा दिला आहे.

पश्चिम बंगालच्या माजी मुख्यमंत्री, तृणमूल काँग्रेसच्या प्रमुख ममता बॅनर्जी यांना मोठा धक्का बसला आहे. ममता बॅनर्जी यांच्या जवळचे नेते मानले जाणारे फिरहाद हकीम यांनी कोलकाताच्या महौपारपदाचा राजीनामा दिला आहे. टीएमसी नेते कुणाल घोष यांनी ही महत्त्वाची माहिती दिली आहे.

फिरहाद हकीम हे पश्चिम बंगालच्या तृणमूल काँग्रेसमधील अल्पसंख्याक समाजाचे मोठे नेते मानले जातात. ते २०१८ सालापासून कोलकाताच्या महापौरपदी विराजमान आहे. कोलकाता महापालिका ही २०१० सालापासून तृणमूल काँग्रेसच्या ताब्यात आहे.

फिरहाद हकीम यांच्या राजीनाम्यावर भाष्य करताना टीएमसी नेते कुणाल घोष यांनी म्हटलं की, कोलकाता महापालिकेचे महापौर फिरहाद हकीम यांनी ममता बॅनर्जी यांच्याकडे राजीनामा देण्यासाठी परवानगी मागितली होती. आतापर्यंत ममता बॅनर्जी यांनी राजीनामा देण्याची परवानगी दिली नव्हती. परंतु हकीम यांची ममता बॅनर्जी यांच्यासोबत बैठक झाली. त्यानंतर हकीम यांनी महापौरपदाचा राजीनामा देण्याचा निर्णय घेतला. पश्चिम बंगालमध्ये भाजप सत्तेत आल्याने पालिकेच्या अधिकारात कपात केली जात आहे, असा आरोप टीएमसी नेत्यांनी केला आहे.