Firecracker Blast: फटाक्याच्या कारखान्यात भीषण स्फोट; आगीत होरपळून 18 जणांचा मृत्यू

आंध्र प्रदेशातील काकीनाडा येथे एक भयानक घटना घडली आहे. फटाक्याच्या कारखान्यात भीषण आग लागली असून यात १८ जणांचा मृत्यू झाला आहे. तर अनेकजण गंभीररित्या होरपळले आहेत. ही घटना काकीनाडा जिल्ह्यातील पेड्डापुरम परिसरातील समलकोट मंडळातील वेतलापलेम गावात घडली आहे. या घटनेमुळे परिसरात घबराट पसरली आहे. आग भडकण्याआधी मोठ्या स्फोटांचे आवाज ऐकू आल्याची माहिती स्थानिकांनी दिली.

स्फोट झाला तेव्हा लोक फटाक्यांच्या कारखान्यात होते. अग्निशमन दलाचे पथक घटनास्थळी पोहोचले असून आग विझवण्याचा प्रयत्न करत आहेत. पोलिसांनी घटनास्थळी धाव घेत जखमींना उपचारासाठी जवळच्या रुग्णालयात दाखल केले. मृतांचे मृतदेह ताब्यात घेऊन शवविच्छेदनासाठी पाठवण्यात आले आहेत.

सुरुवातीच्या वृत्तानुसार, कारखान्यात आग लागली, त्यावेळी मोठा स्फोट झाला. स्फोट इतका शक्तिशाली होता की मृतदेह जवळच्या शेतात फेकली गेली. ज्यामुळे रहिवाशांमध्ये भीतीचे वातावरण पसरले होते. कारखाना पूर्णपणे आगीत जळून खाक झाला आहे. काकीनाडा सरकारी जनरल हॉस्पिटलच्या अधीक्षकांनी सांगितले की, ९० ते १०० टक्के भाजलेले सात रुग्ण रुग्णालयात दाखल झाले आहेत. त्यांच्यावर उपचार सुरू आहेत. दरम्यान, मुख्यमंत्री एन. चंद्राबाबू नायडू यांनी या घटनेवर तीव्र दुःख व्यक्त केले.