Mumbai Local Train : मुंबईत एकाच ट्रॅकवर २ लोकल ट्रेन समोरासमोर आल्या अन्...; हा व्हिडिओ बघून म्हणाल, अरे बापरे!

महेंद्र वानखेडे, साम टीव्ही

मुंबई : मुंबईकरांची लाईफलाईन समजल्या जाणाऱ्या लोकल ट्रेनबाबत मोठी बातमी हाती आली आहे. मुंबईत दोन लोकल ट्रेन एकाच ट्रॅकवर समोरासमोर आल्याची घटना घडली. दोन्ही लोकल ट्रेन अचानक समोरासमोर आल्याने प्रवाशांमध्ये एकच भीती पसरली. पश्चिम रेल्वेच्या मिरा रोड स्टेशनवर सायंकाळच्या सुमारास हा प्रकार घडला. मात्र, मोटरमनच्या सतर्कतेमुळे हा अनर्थ टळला आहे. या घटनेचा व्हिडिओ आता समोर आला आहे.

मुंबई आणि ठाणे जिल्ह्यातील बहुतांश नागरिकांचा दिवसभरात लोकल ट्रेनने प्रवास होतो. नोकरीवर पोहोचण्यासाठी नागरिकांचं पहिलं प्राधान्य लोकल ट्रेनला असतं. याच लोकल ट्रेनला प्रवाशांची मोठी गर्दी असते. लोकल प्रवासी प्रचंड गर्दीतून नोकरीसाठी कार्यालय गाठतात. ऑफिसला जाताना प्रवासी निश्चिंत असतात. त्यांना अपघाताची कोणतीही भीती नसते. मात्र, आज बुधवारी लोकल ट्रेनचा मोठा अपघात थोडक्यात टळला. हा प्रकार समजताच अनेक प्रवाशांची झोप उडाली.

नेमकं काय घडलं?

पश्चिम रेल्वेच्या मिरा रोड स्टेशनजवळ मोठी घटना घडली. मिरा रोड रेल्वे स्टेशनवर एकाच ट्रॅकवर दोन लोकल ट्रेन समोरासमोर आल्याची घटना घडली. दादरकडून वसईच्या दिशेने जाणाऱ्या मार्गावर मिरा रोड रेल्वे स्टेशन येथील प्लॅटफॉर्म क्रमांक तीन वर एकाच रेल्वे ट्रॅकवर दोन्ही ट्रेन आल्या. दोन्ही लोकल ट्रेन समोरासमोर येऊ लागल्याने स्टेशनवर उभे असणाऱ्या प्रवाशांमध्ये एकच भीती पसरली. लोकल ट्रेनच्या मोटनमनच्या सतर्कतेमुळे काही मीटर अंतरावर दोन्ही ट्रेन थांबवण्यात आल्या. त्यामुळे मोठा अनर्थ टळला.

अन् रेल्वे सेवा पुन्हा सुरळीत

मिरारोड रेल्वे स्टेशनजवळ दोन लोकल ट्रेन समोरासमोर आल्याने सेवा विस्कळीत झाली होती. मात्र, काही वेळेने मिरारोड आणि भाईंदर रेल्वे सेवा सुरळीत झाली. सिग्नल बिघाड झाल्याने ही घटना घडल्याची समोर आलं आहे. सायंकाळी ५.३० वाजता ही घटना घडली आहे. दोन्ही लोकल ट्रेन १० मिनिटे समोरासमोर उभ्या होत्या. या प्रकारानंतर प्रवासी घाबरून रेल्वे ट्रॅकवर उतरले आणि पायी चालू लागले.