Mega Block Today : प्रवाशांसाठी मोठी बातमी! मध्य रेल्वेवर आज आणि उद्या पॉवर ब्लॉक; 'या' ट्रेन राहणार बंद

Mumbai Railway Local Train Mega Block Today प्रवाशांसाठी मोठी बातमी! आज म्हणजेच १३ जून आणि उद्या १४ जून रोजी जर ररेल्वेने प्रवास करणार असाल तर रेल्वेचं वेळापत्रक बघून बाहेर पडा, कारण मध्य रेल्वेच्या १३ आणि १४ जूनच्या मध्यरात्री विशेष ट्रॅफिक आणि पॉवर ब्लॉक घेण्यात येणार आहे. रेल्वेने दिवा स्थानकात नवीन पादचारी पुलाच्या (एफओबी) उभारणीसाठी महत्त्वाचे काम हाती घेतले असून त्यासाठी हा पॉवर ब्लॉक घेण्यात येणार आहे. या कामामुळे ठाणे आणि कल्याणदरम्यान उपनगरी रेल्वे सेवांवर मोठा परिणाम होणार असून अनेक लोकल गाड्या रद्द, शॉर्ट टर्मिनेट किंवा वळवण्यात येणार आहेत.

मध्य रेल्वेच्या मुंबई विभागाकडून दिवा स्थानकाच्या दक्षिण आणि उत्तर दिशेला नवीन पादचारी पुलासाठी गर्डर बसवण्याचे काम करण्यात येणार आहे. त्यासाठी १३ जूनच्या मध्यरात्री १.२० वाजल्यापासून १४ जून रोजी पहाटे ५.४० वाजेपर्यंत विशेष ब्लॉक लागू असेल. या कालावधीत कळवा ते डोंबिवली दरम्यान अप आणि डाऊन जलद तसेच धीम्या मार्गांवर रेल्वे वाहतुकीवर निर्बंध राहतील.

ब्लॉकदरम्यान ठाणे-कल्याण स्थानकांमधील लोकल सेवा पूर्णपणे बंद राहणार असल्याने प्रवाशांना मोठा फटका बसण्याची शक्यता आहे. काही अप धीम्या लोकल गाड्या कल्याण आणि ठाणे दरम्यान जलद मार्गावरून चालवल्या जाणार असून त्या ठाकुर्ली आणि कोपर स्थानकांवर थांबणार नाहीत. परिणामी या गाड्या १० ते १५ मिनिटे उशिराने धावतील. शनिवारी रात्री आणि रविवारी पहाटे सुटणाऱ्या अनेक लोकल गाड्या रद्द करण्यात आल्या आहेत. याशिवाय काही गाड्यांचा प्रवास कुर्ला, परळ आणि ठाणे स्थानकांवरच समाप्त करण्यात येणार आहे. तर काही गाड्या त्यांच्या नियोजित स्थानकाऐवजी कुर्ला, ठाणे किंवा कल्याण येथून शॉर्ट ओरिजनेट केल्या जाणार आहेत.

या ब्लॉकचा परिणाम काही मेल आणि एक्सप्रेस गाड्यांवरही होणार आहे. भुवनेश्वर-छत्रपती शिवाजी महाराज टर्मिनस कोणार्क एक्सप्रेस तसेच हावडा-छत्रपती शिवाजी महाराज टर्मिनस एक्सप्रेस या गाड्या कल्याण आणि ठाणे दरम्यान सहाव्या मार्गावरून वळवण्यात येतील. त्यामुळे त्या नियोजित शेवटच्या स्टेशनला १५ ते २० मिनिटे उशिराने पोहोचण्याची शक्यता आहे.

प्रवाशांनी प्रवासापूर्वी रेल्वेच्या अधिकृत वेळापत्रकाची माहिती घेऊनच प्रवासाचे नियोजन करावे, असे आवाहन मध्य रेल्वे प्रशासनाने केले आहे. पायाभूत सुविधांच्या उभारणीसह प्रवाशांच्या सुरक्षिततेसाठी हे काम आवश्यक असल्याचे रेल्वेने स्पष्ट केले असून होणाऱ्या गैरसोयीबद्दल दिलगिरी व्यक्त केली आहे.