Marathi Language Dispute : मराठीत बोल सांगणाऱ्या तरुणाला कान धरून हिंदीत माफी मागायला लावली; मुंब्र्यातील धक्कादायक घटना,VIDEO

विकास काटे, साम टीव्ही

ठाणे : कल्याणमध्ये परप्रांतीय व्यक्तीने मराठी कुटुंबाला मारहाण केल्याची घटना ताजी असताना मुंब्रा येथे परप्रांतीय फळविक्रेत्यांनी मराठी तरुणाला माफी मागायला लावल्याची घटना घडली आहे. मराठीत बोल असे सांगितल्याने परप्रांतीय फळविक्रेता भडकला. या परप्रांतीय फळविक्रेत्यांने तरुणाला कान धरून माफी मागायला लावल्याची संतापजनक घटना उघडकीस आली आहे. मुंब्रा येथे हा प्रकार घडला आहे. या घटनेने संपूर्ण राज्यात संतापाची लाट उसळली आहे.

महाराष्ट्रात राहायचे असेल तर तुला मराठीत बोलावेच लागेल, असा आग्रह या तरुणाने धरला. पण त्याची शिक्षा म्हणून त्याला चक्क हिंदी भाषेतून माफी मागायला भाग पाडण्यात आले. सर्वात कहर म्हणजे मुंब्रा पोलिसांनी मराठी तरुणाची बाजू न घेता परप्रांतीय फळविक्रेत्यांच्या तक्रारीवरून त्याच्यावरच अदखलपात्र गुन्हा दाखल केला आहे. नाव विशाल गवळी असे मराठी तरुणाचे नाव आहे. मराठीवरील अन्याय आणखी किती दिवस सहन करणार, असा सवाल विचारण्यात येत आहे.

परप्रांतीय फळविक्रेता शोएब कुरेशी याचे साथीदार तातडीने जमा झाले आणि मराठमोळया विशालला अक्षरश: घेरले. तसेच त्याला दमबाजी केली आणि धारेवर धरले. काही जणांनी तर विशाल याला शिवीगाळ देखील केली. अखेर त्याला फळविक्रेत्यांनी कानाला धरून हिंदीत माफी मागायला भाग पाडले. ही बाचाबाची समजताच मुंब्रा पोलीस घटनास्थळी दाखल झाले.

पोलिसांनी वाद सोडवण्याऐवजी विशाल गवळी यालाच पोलीस स्टेशनला आणले आणि त्याच्याविरोधात अदखलपात्र गुन्हा दाखल केला. मात्र या घटनेचा व्हिडीओ सोशल मीडियावर व्हायरल झाला आणि त्यावरून सोशल मीडियावर पोलिसांच्या या एकतर्फी भूमिकेमुळे संताप व्यक्त होत आहे. महाराष्ट्रात मराठी बोला, असे सांगणे हा गुन्हा आहे काय, असा सवालही विचारला जात आहे.

मुंब्य्रातील फळविक्रेत्याला मराठीतून बोलण्याचा आग्रह धरणारा विशाल गवळी याची आई कमला गवळी यांनी प्रसारमाध्यमाशी बोलताना सांगितले की, माझा मुलगा सध्या आजारी आहे. त्याच्यावर उपचार सुरू असून तो अधूनमधून चिडचिड करतो. त्यामुळे पोलिसांनी त्याच्यावर कारवाई करू नये, अशी मागणीही आईने केली आहे.