Uddhav Thackeray: 'घालीन लोटांगण, वंदिन चरण', उद्धव ठाकरेंच्या सभेआधी विरोधकांकडून बॅनरबाजी, ठाण्यात राजकारण तापलं!

वैदैही कानेकर, मुंबई|ता. १० ऑगस्ट २०२४

शिवसेना ठाकरेगटप्रमुख उद्धव ठाकरे हे आज ठाणे जिल्ह्याच्या दौऱ्यावर येणार आहेत. मुख्यमंत्री एकनाथ शिंदे यांच्या बालेकिल्ल्यात ठाकरेंची जाहीर सभा होणार आहे. या सभेआधी उद्धव ठाकरे यांना डिवचणारे बॅनर्स लावण्यात आल्याने राजकीय वातावरण चांगलेच तापले आहे. उद्धव ठाकरे यांच्या दिल्ली दौऱ्यावरुन या बॅनर्समधून टीका करण्यात आली आहे.

ठाणे शहरामध्ये आज शिवसेना उद्धव बाळासाहेब ठाकरे पक्षाचा मेळावा पार पडणार आहे. गजकरी रंगायतन नाट्यगृहात आज संध्याकाळी हा मेळावा होणार असून पक्षप्रमुख उद्धव ठाकरे यावेळी मार्गदर्शन करणार आहेत. ठाकरेंच्या दौऱ्यामुळे मुख्यमंत्री एकनाथ शिंदे यांचा बालेकिल्ला असलेल्या ठाण्यामध्ये राजकारण चांगलेच तापले आहे.

ठाकरे गटाच्या या मेळाव्यापूर्वीच ठाणे शहरात पक्षप्रमुख उद्धव ठाकरे यांच्या दिल्ली दौऱ्यावरुन डिवचणारे बॅनर्स लावण्यात आले आहेत. उद्धव ठाकरे हे हे राष्ट्रवादी काँग्रेसते नेते शरद पवार आणि काँग्रेस नेत्या सोनिया गांधी, राहुल गांधी यांच्यासमोर लोटांगण घालत असल्याचे व्यंगचित्रांचे मोठे होर्डिंग अनेक ठिकाणी लागले आहेत.

दरम्यान, हे बॅनर्स कोणी लावले हे समोर आले नसले तरी या बॅनर्समुळे ठाण्यामध्ये राजकीय वातावरण चांगलेच तापले आहे. दरम्यान, या बॅनरवरुन राजकीय वाद उफाळण्याची शक्यता आहे, त्यामुळे पोलिसांकडून हे बॅनर्स हटवण्यात आल्याचे सांगण्यात येत आहे. तसेच आजच्या ठाकरेंच्या दौऱ्याच्या पार्श्वभूमीवर परिसरात मोठा पोलीस बंदोबस्त ठेवण्यात आला आहे.