कडक उन्हाचा फटका, पोहायला गेले, पुन्हा परतलेच नाही; २ जिवलग मित्रांसह ५ जणांचा मृत्यू

पुणे : राज्यातील विविध जिल्ह्यात उन्हाचा कडाका वाढला आहे. पुण्यासह जुन्नरच्या नागरिकांनाही उन्हाचा कडाका सहन करावा लागत आहे. याच कडक उन्हात थंडावा मिळवण्यासाठी पाण्यात पोहायला गेलेल्या दोन शाळकरी मुलांचा मृत्यू झाल्याची घटना उघडकीस आली आहे. तर चंद्रपुरातही तिघांचा बुडून झाल्याची घटना घडली आहे.

मिळालेल्या माहितीनुसार, जुन्नरमधील दोन जिवलग मित्र थंडावा मिळवण्यासाठी शेततळ्यात पोहायला गेले होते. परंतु पाण्याच्या खोलीचा अंदाज न आल्याने त्यांचा बुडून मृत्यू झाला. ही दुर्घटना गावातील एका शेतातील तळ्यात घडली. दोघे जण पाण्यात बुडाल्याची माहिती मिळताच पोलीस आणि रेस्क्यू टीम तात्काळ घटनास्थळी पोहोचली.

रेस्क्यू पथकाने दोन्ही मुलांचे मृतदेह बाहेर काढले. पोहायला गेलेल्या दोन मित्रांच्या मृत्यूने संपूर्ण गाव हळहळले. या घटनेने दोघांच्या मैत्रीचा शेवटही वेदनादायी ठरलाय. उन्हाळ्यात पोहण्यासाठी शेततळे, विहिरी, तलावामध्ये जाताना मुलांनी मोठ्यांच्या देखरेखीशिवाय जाऊ नये, खोल पाण्यात उतरणे टाळावे आणि पालकांनी सतत लक्ष ठेवावे, असे आवाहन प्रशासनाकडून करण्यात येत आहे.

पिता पुत्रीसह तिघांचा बुडून मृत्यू

चंद्रपूर जिल्ह्यातील धानोरा गावात कपडे धुण्यासाठी गेलेल्या तिघांचा वर्धा नदीत बुडून तिघांचा मृत्यू झाला. मृतांमध्ये राजू कोडापे (वय 40), अर्पिता कोडापे (वय 12) पिता-पुत्री आणि प्रियांका मडावी (वय 14) या भाचीचा समावेश आहे. नदीकाठी कपडे धुण्यासाठी गेले असताना पाण्याचा अंदाज न आल्याने तिघेही पाण्यात बुडाले, अशी प्राथमिक माहिती समोर येत आहे. घटनेची माहिती मिळताच पोलिसांनी घटनास्थळी धाव घेतली. या दुर्दैवी घटनेमुळे धानोरा गावात शोककळा पसरली आहे.