कर्जत-पनवेल प्रवास फास्ट होणार; गेमचेंजर रेल्वे प्रकल्पाबाबत मोठी अपडेट समोर

नवी मुंबई, कर्जत प्रवास लवकरच जलदगतीने होणार आहे. कर्जत-पनवेल रेल्वे मार्गिकेबाबत महत्वाची अपडेट समोर आली आहे. या मार्गिकेच्या कामाने वेग घेतला आहे. या प्रकल्पाचं ९५ टक्के काम पूर्ण झालं आहे. त्यामुळे पुढील काही महिन्यात रेल्वे प्रकल्प नागरिकांसाठी खुला होण्याची शक्यता आहे.

मुंबई रेल्वे विकास महामंडळाने मुंबई नागरी परिवहन प्रकल्प ३ अंतर्गत काम हाती घेण्यात आलं आहे. पनवेल ते कर्जत हा २९.६ किमी लांबीचा दुहेरी मार्गाचा प्रकल्प आहे. हा प्रकल्प २,७८२ कोटी रुपयांच्या खर्चातून विकसित करण्यात येतोय. या मार्गामुळे पनवेल आणि कर्जतदरम्यान पर्यायी लोकल सेवा सुरू होत आहे.

नव्या मार्गामुळे कल्याणमार्गे धावणाऱ्या लोकलमधील गर्दी कमी होण्याची शक्यता आहे. या गेमचेंजर प्रकल्पासाठी आवश्यक असलेली खासगी आणि सरकारी जमीन संपादित करण्यात आली आहे. तसेच सर्व मोठे, छोटे पूल, उड्डाणपूल, भुयारी मार्ग, बोगदे आणि अस्तरीकरणाची कामे बहुतांश पूर्ण झाल्याचे सांगण्यात आलं आहे. कर्जत येथील रेल्वे उड्डाणपूल पूर्ण झाला आहे. आता रुळ जोडणीचे काम सुरू आहे.

पनवेल रेल्वे उड्डाणपूलाचे काम देखील अंतिम टप्प्यात पोहोचले आहेत. तर मोहोपे आणि किरावली येथील उड्डाणपूल वाहतुकीसाठी सुरू देखील करण्यात आली आहे. पनवेल, चिखले आणि मोहापे येथील स्थानकांच्या इमारतींची कामे पूर्ण झाली आहे. चौक आणि कर्जत स्थानकांवरील कामेही वेगाने पूर्ण केली जात आहेत. जवळपास ६० किमी मार्गावर खडी टाकण्याचे काम झालं आहे.