मध्य रेल्वेचा मोठा निर्णय; गर्दीत धावणार १५ डब्यांच्या लोकल, कर्जत-खोपोली, कसारा, बदलापूरच्या प्रवाशांना दिलासा

प्रवाशांची वाढती गर्दी लक्षात घेत मध्य रेल्वेने १५ ऑगस्टपासून १२ डब्यांच्या आणखी २२ लोकल १५ डब्यांच्या करण्याचा निर्णय घेतलाय. त्यामुळे मध्य रेल्वेच्या उपनगरी मार्गावर १५ डब्यांच्या लोकलची संख्या ३२ वरून ५४ होणार आहे. या बदलामुळे या प्रत्येक लोकलची प्रवासी क्षमता २५ टक्क्यांनी वाढणार आहे.

सीएसएमटी-कर्जत/खोपोली मार्गावर या २२ लोकल धावतील. त्यामुळे अंबरनाथ, बदलापूर, कर्जत आणि खोपोलीच्या दिशेने प्रवास करणाऱ्या प्रवाशांना मोठा फायदा होणारय. या सेवांमध्ये सकाळच्या गर्दीच्या वेळेतील अंबरनाथ-सीएसएमटी आणि खोपोली-कर्जत या दोन लोकल, तर सायंकाळीच्या गर्दीच्या वेळेतील सीएसएमटी-अंबरनाथ आणि सीएसएमटी-कर्जत या दोन लोकलचा समावेश असणार आहे.

आधी २० जुलैला १५ डब्यांच्या लोकलची संख्या ३२ झाली होती. त्यावेळी १२ डब्यांच्या १० सेवांचे १५ डब्यांमध्ये रूपांतर करण्यात आले होतं. आता आणखी २२ सेवांचे रूपांतर केल्याने ही संख्या ५४ वर पोचलीय. मात्र लोकलच्या एकूण फेऱ्यांची संख्या १,८२० इतकीच राहील.

काही लोकलसेवांच्या वेळेत बदल

१५ डब्यांच्या लोकल सुरू करताना काही सेवांमध्ये बदल करण्यात आलेत. खोपोली-परळ लोकल आता खोपोली-दादर लोकल म्हणून पहाटे ४:५० वाजता सुटेल. तसेच परळ-खोपोली लोकलऐवजी दादर-खोपोली लोकल सकाळी ७:४३ वाजता सुटेल. सीएसएमटी-खोपोली आणि सीएसएमटी-अंबरनाथ या दोन लोकल धीम्याऐवजी जलद करण्यात आल्यात. तर दर शनिवारी देखभालीसाठी दादर-अंबरनाथ १५ डब्यांची सेवा रद्द राहील असं मध्य रेल्वेकडून सांगण्यात आले आहे.