मुंबईकरांसाठी गुड न्यूज! BMC कडून ४२६ घरांसाठी लॉटरी जाहीर, कधी, कुठे अन् कसा करायचा अर्ज?

Summary -

• बीएमसीकडून ४२६ घरांसाठी लॉटरीची घोषणा करण्यात आली

• अर्ज प्रक्रिया १६ ऑक्टोबर ते २१ नोव्हेंबर २०२५ दरम्यान होईल

• पात्र अर्जदारांची यादी १८ नोव्हेंबर रोजी जाहीर होईल

• अंतिम सोडत २० नोव्हेंबर रोजी पार निघेल

संजय गडदे, मुंबई

मुंबईमध्ये हक्कांच्या घराचे असावे असे स्वप्न पाहणाऱ्यांचे स्वप्न आता पूर्ण होणार आहे. कारण मुंबईकरांना महापालिकेकडून दिवाळी भेट मिळणार आहे. मुंबई महापालिकेकडून ४२६ सदनिकांची विक्री केली जाणार आहे. या प्रक्रियेला १६ ऑक्टोबरपासून प्रारंभ होणार आहे. यासाठी मुंबईकर अर्ज करू शकतात. अर्ज करण्याची प्रक्रिया कशी असणार आणि लॉटरी कधी निघणार हे आपण जाणून घेणार आहोत...

बृहन्मुंबई महानगरपालिकेकडून अत्यल्प आणि अल्प उत्पन्न गटातील नागरिकांसाठी घरांच्या विक्रीची प्रक्रिया सुरू होत आहे. ही मुंबईकरांसाठी खास दिवाळीची भेट ठरणार आहे. विकास नियंत्रण व प्रोत्साहन नियमावली-२०३४ च्या विनियम १५ व ३३ (२०)(ब) अन्वये प्राप्त ४२६ सदनिकांच्या विक्रीसाठी महापालिकेकडून १६ ऑक्टोबर ते २१ नोव्हेंबर २०२५ या कालावधीत प्रक्रिया राबविण्यात येणार आहे.

महापालिका आयुक्त आणि प्रशासक भूषण गगराणी यांच्या निर्देशानुसार ही संपूर्ण प्रक्रिया ऑनलाइन पद्धतीने पार पडणार आहे. नागरिकांना https://bmchomes.mcgm.gov.in या संकेतस्थळावरून अर्ज करता येतील. अर्ज १६ ऑक्टोबर रोजी सकाळी १० वाजल्यापासून उपलब्ध होतील. तर अंतिम सोडत २० नोव्हेंबर रोजी घेण्यात येईल.

पात्र अर्जदारांची यादी १८ नोव्हेंबर आणि सोडतीचे निकाल २१ नोव्हेंबर रोजी वेबसाइटवर प्रसिद्ध केले जातील. घरांच्या सोडतीसंदर्भात माहिती आणि मदतीसाठी ०२२-२२७५४५५३ या क्रमांकावर किंवा bmchomes@mcgm.gov.in या ईमेलवर संपर्क साधण्याचे आवाहन महापालिकेकडून करण्यात आले आहे.