बदलापूर पुन्हा हादरलं! शाळेच्या बस चालकाकडून ४ वर्षीय मुलीवर अत्याचार

बदलापुरात पुन्हा एकदा संतापजनक घटना घडली आहे. मुंबईपासून जवळ असलेल्या बदलापूर शहरात पुन्हा एकदा चिमुकलीवर अत्याचार केल्याची घटना घडलीये. शाळेच्या मिनी बस चालकाने ४ वर्षीय चिमुकलीवर अत्याचार केल्याची घटना उघडकीस आली आहे. या घटनेने एकच खळबळ उडाली आहे. या प्रकरणी बदलापूर पश्चिम पोलीस ठाण्यात गुन्हा दाखल करण्यात आला आहे.

बदलापुरात काही महिन्यांपूर्वी एका चिमुकलीवर अत्याचाराची घटना घडली होती. या घटनेविरोधात संतप्त बदलापूरकरांनी लोकल ट्रेन थांबवल्या होत्या. बदलापूरच्या त्या घटनेचा संपूर्ण देशात निषेध नोंदवण्यात आला होता. पोलिसांनी त्या घटनेतील मुख्य आरोपीचा एन्काऊंटर केला होता. आता त्याच घटनेची पुन्हा पुनरावृत्ती समोर आली आहे. बदलापूर पश्चिम भागात ४ वर्षीय चिमुकलीवर अत्याचाराची घटना घडली. अत्याचाराच्या घटनेने बदलापूरकरांमध्ये संतापाची लाट उसळली आहे.

नेमकं काय घडलं?

शाळेच्या मिनी बसमध्येच चालकाने ४ वर्षीय मुलीवर अत्याचार केला. या घटनेची माहिती चिमुकलीने घरी पालकांना सांगितली. त्यानंतर पोलिसांनी बस चालकाला ताब्यात घेतलं असून पुढील तपास देखील सुरू करण्यात आला आहे. या प्रकरणी बदलापूर पश्चिम पोलीस ठाण्यामध्ये गुन्हा दाखल करण्यात आला आहे.

बदलापूरच्या उपनगराध्यक्ष प्रियंका दामले यांनी घटनेचा निषेध केला. या घटनेवर प्रतिक्रया देताना दामले म्हणाल्या, ' बदलापुरातील खासगी शाळेच्या व्हॅन चालकाने चिमुकलीवर अत्याचार केल्याचा प्रकार केलाय. या घटनेची प्राथमिक माहिती घेण्यासाठी पोलीस स्टेशनला आलो. आरोपी व्यक्तीवर गुन्हा दाखल करून अटक करण्यात आली आहे. पोलिसांनी कारवाईची प्रक्रिया सुरू केली आहे. पोलिसांनी या प्रकरणात पीडित मुलीला न्याय द्यावा'.