शॉपिंग मॉलमध्ये अग्नितांडव! ६१ जणांचा आगीत होरपळून मृत्यू, अनेकांच्या संसाराची राखरांगोळी

पाकिस्तानच्या कराची शहरात शॉपिंग मॉलला शनिवारी रात्री भीषण आग लागल्याची घटना घडली. शॉपिंग मॉलला लागलेल्या आगीत ६१ जणांचा मृत्यू झाल्याची अधिकृत माहिती समोर आली आहे. आग लागल्यानंतर अवघ्या काही मिनिटांत आग सर्वत्र पसरली. या आगीवर अग्निशमन दलाच्या जवानांनी ३६ तासानंतर नियंत्रण मिळवलं. या दुर्घटनेत अनेकांच्या संसाराची राखरांगोळी झाली आहे.

शॉपिंग मॉलच्या आगीत ६० हून अधिक जणांचा मृत्यू झाला असून मृतांची ओळख पटवणे मोठे आव्हानात्मक ठरत आहेत. सिंध पोलिसांच्या पथकातील डॉ. सुमैया सैद यांच्या माहितीनुसार, स्फोटातील केवळ ६१ मृतदेहापैकी केवळ १२ जणांच्या मृतदेहाची ओळख पटवण्यात यश आलं आहे. आगीनंतर अनेक मृतदेहांचे तुकडे सापडले आहेत. मृचदेहाची ओळख पटवण्यासाठी ५० लोकांचे डीएनए नमुने जमा केले आहेत. मृतदेहाची ओळख पटविण्यासाठी पोलिसांकडून इतर मार्गाचाही अभ्यास केला जात आहे.

दुर्घटना घडल्यानंतर कराचीचे आयुक्त सैयद हसन नकवी यांनी घटनास्थळी धाव घेतली होती. मॉलला नेमकी कशी आग लागली, याचा शोध घेण्याचे आदेश आयुक्तांनी पोलिसांना दिले आहेत. कराचीचे आयुक्त सैयद हसन नकवी यांनी घटनास्थळाची पाहणी केली. मॉलमध्ये सुरुवातीला खेळणे आणि मुलांच्या कपड्याच्या दुकानाला आग लागली. शॉर्ट सर्किटमुळे शॉपिंग मॉलला आग लागल्याची माहिती मिळत आहे.

शॉपिंग मॉलमध्ये एकूण १२०० दुकाने होती. या मॉलमध्ये होरपळून मृत्यू झालेल्यांचा अद्याप शोध घेणे सुरूच आहे. या मॉलमध्ये लावण्यात आलेल्या सीसीटीव्ही कॅमेऱ्याच्या फुटेजही तपासले जात आहे. पालिकेच्या अधिकाऱ्याच्या माहितीनुसार, दुर्घटनेनंतर बेपत्ता झालेल्यांचा शोध घेण्यास तब्बल १०-१५ दिवस लागण्याची शक्यता आहे.