Badlapur Protest: चिमुकल्यांसाठी न्याय मागणं महागात पडलं; आंदोलकांच्या कुटुंबीयांचा कोर्टाबाहेर हंबरडा

भरत मोहळकर, साम प्रतिनिधी

बदलापूरच्या चिमुकल्यांना न्याय देण्याची मागणी करून प्रशासनाला जागं करणाऱ्या आंदोलकांवरच गुन्हे दाखल करण्यात आलेत. त्यामुळे बदलापुरकरांविरोधात संतापाची लाट उसळीय.. त्यावरचा हा विशेष रिपोर्ट.

बदलापूरमध्ये 2 चिमुकल्यांवर हैवानाने अत्याचार केले. पोलिसांनी कारवाई करण्यास दिरंगाई केली आणि बदलापूरकरांच्या भावनांचा उद्रेक झाला. आरोपीला फाशीची शिक्षा देण्याची मागणी करण्यासाठी आंदोलकांनी रेलरोको केला. चिमुकल्यांसाठी रस्त्यावर उतरून आक्रोश करणा-या आंदोलकांवरच पोलिसांनी कारवाईचं सत्र सुरू केलंय.

चिमुकल्यांसाठी लढणा-यांवरच कारवाई

बदलापूरमधील आंदोलनप्रकरणी रेल्वे पोलिसांनी तब्बल 2 हजारपेक्षा अधिक आंदोलनकर्त्यांवर गुन्हे दाखल केलेत. तर बदलापूर पूर्व आणि पश्चिम पोलिस स्टेशनमध्ये 42 तर रेल्वे पोलिसांनी 30 जणांना अटक केलीय.. कल्याण कोर्टानं आंदोलकांना 14 दिवसांची न्यायालयीन कोठडी सुनावलीय. पोलिसांनी वेळेवर पीडितांची तक्रार नोंदवून आरोपीवर कारवाई केली असती तर हा मुद्दा एवढा पेटला नसता. या आंदोलनामुळे पोलिसांची लक्तरं वेशीला टांगली गेल्यामुळे सुडाच्या भावनेतून आंदोलकांवर कारवाई करत असल्याचा आरोप बदलापूरच्या वकिलांनी केलाय.

पोलिसांनी पीडित पालकांची वेळेवर दखल घेतली असती तर न्याय मिळवून देण्यासाठी बदलापूरच्या जनतेला रस्त्यावर उतरावं लागलं नसतं. त्यामुळे या प्रकरणी हलगरजीपणा करणा-यांवर कारवाई कऱण्याऐवजी प्रशासनाला जागं करणा-या आंदोलकांवरच कारवाईचा धडाका लावलाय. त्यामुळे बदलापूरच्या नागरिकांमध्ये संतापाचं वातावरण आहे.