छटपुजेच्या नावाखाली नदीपात्रात मातीचा डोंगर; प्रशासन गप्प का? बदलापुरात संतापाचा उद्रेक!

बदलापुरात छटपुजेचा वाद चांगलाच पेटलाय. छटपुजेच्या नावाखाली उल्हास नदी पात्रात शेकडो ब्रास मातीचा भराव टाकण्यात आलाय. विशेष म्हणजे एव्हढ्या मोठ्या प्रमाणात मातीचा भराव टाकूनही तहसिलदार अमित पुरी यांनी त्याकडे सपशेल दुर्लक्ष केल्याचा आरोप नागरिकांकडून करण्यात येतोय. त्यामुळे अमित पुरी नेमकं कुणाला पाठिशी घालतायेत असा सवाल आता विचारला जातोय. आयोजकांवर गुन्हे दाखल करून हे काम त्वरीत थांबवावं अन्यथा तीव्र आंदोलन छेडू असा इशारा स्थानिक सामाजिक कार्यकर्त्या संगीता चेंदवणकर तसंच मनसे पदाधिकाऱ्यांनी दिलाय.

बदलापुरात उत्तर भारतीयांची संख्या मोठी असून छटपुजेसाठी उल्हास नदीवर जय्यत तयारी सुरू आहे. जेसीबी आणि डंपरच्या सहाय्यानं याठिकाणी मोठ्या प्रमाणात मातीचा भराव उल्हास नदीत टाकण्याचं काम सुरू आहे. उल्हास नदीचा परिसर हा सरकारनं ब्लू लाईन घोषित केलाय. त्यामुळे उल्हास नदीच्या पात्रात किंवा 'ब्लू लाईन' हद्दीत कोणत्याही प्रकारचा मातीचा भराव टाकण्यास कायद्यानं सक्त मनाई आहे. नदीचा नैसर्गिक प्रवाह बाधित होईल असं कोणतंही काम हा गंभीर पर्यावरणीय गुन्हा मानला जातो, असं असतानाही याठिकाणी बिनदिक्कतपणे मातीचा भराव टाकला जात आहे.

प्रशासनाकडून कडक कारवाई अपेक्षित असताना तहसिलदार मूग गिळून गप्प आहेत. त्यामुळे त्यांचा या मातीच्या भरावाला अप्रत्यक्ष पाठिंबा आहे का? असा आरोप बदलापूरकरांकडून केला जातोय. गणेशोत्सव काळात प्रशासनाच्या वतीने उल्हास नदीत गणेशमूर्ती विसर्जनाला मज्जाव करण्यात आला होता. मग हाच नियम छटपुजेसाठी का नाही असा प्रश्न विचारला जातोय. तहसीलदार अमित पुरी यांनी यावर तात्काळ कारवाई न केल्यास तीव्र आंदोलन छेडण्याचा इशारा संगीता चेंदवणकर तसच मनसे पदाधिकाऱ्यांनी दिलाय.