Nashik Accident : क्षणात होत्याचं नव्हतं झालं; भीषण अपघातात भावासमोर बहिणीने जीव सोडला

नाशिक : नाशिकमध्ये भीषण अपघाताची घटना घडली आहे. नाशिकच्या दिंडोरी रोडवर भरधाव पिकअपने चार वाहनांना धडक दिल्याने अपघात झालाय. या भीषण अपघातात एका तरुणीचा जागीच मृत्यू झाला. तर तिघे जण गंभीर जखमी झाले आहेत. म्हसरुळ पोलीस ठाण्याच्या हद्दीत अपघाताची घटना घडली आहे. अपघातानंतर पोलिसांनी अपघातग्रस्त पिकअप चालकाला ताब्यात घेतलंय.

मिळलेल्या माहितीनुसार, जयश्री सोनावणे नावाची तरुणी तिच्या भावासोबत दुचाकीवरून जात होती. दुचाकीवर असताना पाठीमागून पिकअप वाहनाने जबर धडक दिली. या धडकेत जयश्री आणि तिचा भाऊ सुमित हे दोघेही दुचाकीवरून जमिनीवर पडले. या भीषण अपघातात जयश्रीचा जागीच मृत्यू झाला. तर भाऊ सुमित जखमी झाला.

पिकअपने पुढे जाऊन दोन दुचाकी आणि एक चारचाकी वाहनाला धडक दिली. या अपघात दुसऱ्या दुचाकीवरील दोन तरुण जखमी झाले. त्यांना तातडीने रुग्णालयात दाखल करण्यात आलं. त्यांच्यावर उपचार सुरु आहेत. भीषण अपघातानंतर रस्त्यावर एकच धावाधाव झाली.

भीषण अपघातानंतर पिकअप चालकाला ताब्यात घेतलंय. पोलिसांनी त्याची चौकशी सुरु केली आहे. त्याने पोलिसांना अपघाताचं अजब कारण दिलं. पिकअप चालवताना मांडीवर बसलेल्या मुलाने अॅक्सेलेरेटवर पाय दिल्याने वाहनाचा स्पीड वाढला. त्यानंतर अपघात झाल्याचा चालकाचा दावा आहे. प्रत्यक्षदर्शीच्या सांगण्यानुसार, पिकअप चालक हा गाडी चालवत असताना नशेत होता. या अपघात प्रकरणी पोलीस ठाण्यात नोंद करण्यात आली आहे. पोलिसांनी अधिक तपासाला सुरुवात केली आहे.

बुलडाण्यात भरधाव एसटी बस उलटली

बुलडाणा जिल्ह्यातील खामगाव ते पिंपळगाव राजा मार्गावर प्रवाशांनी भरलेली एसटी बस रात्रीच्या वेळी उलटली. या बसमधील 12 प्रवासी यामध्ये जखमी झाले आहेत. तत्काळ पोलीस घटनास्थळी दाखल होऊन जखमींना उपचारासाठी खामगाव शासकीय रुग्णालयात दाखल करण्यात आले. घाटपुरी ते पिंपळगाव राजा रस्त्याचे काम या ठिकाणी सुरू आहे. या रस्त्याच्या बाजूला टाकलेल्या भरावावरून ही बस उलटली. गेल्या काही दिवसांत या ठिकाणी मोठ्या प्रमाणात अपघातांची मालिका सुरू असून अनेक वाहने रस्त्याच्या कडेला उलटत आहेत.