बड्या पोलीस अधिकाऱ्याचे निधन, महाराष्ट्र पोलीस दलात शोककळा

राज्य राखीव पोलीस दल एसआरपीएफ गट-5, दौंडचे समादेशक म्हणून कार्यरत असलेले पोलिस अधीक्षक तुषार पाटील यांचे वयाच्या अवघ्या 45 व्या वर्षी निधन झाले. त्यांच्या निधनाने पोलीस दलात हळहळ व्यक्त होत आहे. काही दिवसांपासून प्रकृती अस्वस्थ असल्याने त्यांना पुण्यातील रबी हॉल क्लिनिक येथे उपचारासाठी दाखल करण्यात आले होते. मात्र उपचारादरम्यान त्यांची प्रकृती खालावली आणि त्यांनी अखेरचा श्वास घेतला.

आठ वर्षांपूर्वी तुषार पाटील यांच्यावर किडनी प्रत्यारोपणाची शस्त्रक्रिया करण्यात आली होती, त्यावेळी त्यांच्या वडिलांना त्यांना किडनी दान केली होती. अलीकडे पुन्हा प्रकृती बिघडल्याने त्यांना रुग्णालयात दाखल करण्यात आले होते. दरम्यान एसआरपीएफच्या पेपरफुटी प्रकरणातही त्यांचे नाव समोर आले होते, ज्यामुळे ते चर्चेत आले होते. जळगाव येथील त्यांच्या मूळ गावी त्यांच्यावर शासकीय इतमामात अंत्यसंस्कार करण्यात येणार असल्याची माहिती मिळत आहे.

कोल्हापूर यथे नागरी हक्क संरक्षण विभागाच्या अधीक्षक पदावरून दौंड येथे समादेशक तथा पोलीस अधीक्षक म्हणून तुषार पाटील यांची बदली झाली होती, तुषार पाटील यांनी पोलीस अधीक्षक म्हणून कोल्हापूर, रत्नागिरी, मुंबई येथे वाहतूक विभागात सेवा केली आहे. अतिरिक्त पोलीस अधीक्षक म्हणून त्यांनी सिंधुदुर्ग, रत्नागिरी, पुणे लोहमार्ग पोलीस दल येथे काम पाहिले होते.