Santosh Deshmukh Case: मोठी बातमी! कृष्णा आंधळेची संपत्ती जप्त होणार, कोर्टानेच दिले आदेश

संतोष देशमुख हत्या प्रकरणामध्ये मोठी अपडेट समोर आली आहे. याप्रकरणातील फरार आरोपी कृष्णा आंधळेची संपत्ती जप्त करण्याचे आदेश कोर्टाने दिले आहेत. कृष्णाच्या नावावर ५ वाहने तसंच धारूर आणि केजमध्ये बँक खाते आहेत. ही सर्व संपत्ती आता जप्त होणार आहे. संतोष देशमुख यांची हत्या झाल्यापासून कृष्णा आंधळे फरार असून पोलिस त्याचा शोध घेत आहेत.

संतोष देशमुख हत्या प्रकरणातील फरार आरोपी कृष्णा आंधळे याची संपत्ती जप्त करण्याचे आदेश कार्टाने दिले आहेत. संतोष देशमुख यांची ९ डिसेंबर २०२४ रोजी हत्या करण्यात आली होती. त्यांची हत्या झाल्यापासून कृष्णा आंधळे फरार आहे. पोलिस त्याचा शोध घेत आहेत. ६५ दिवसांनंतरही तो फरार आहे. आता त्याच्या मुसक्या आवळ्यासाठी कोर्टाने पाऊल उचलले आहे. कृष्णा आंधळेची संपत्ती जप्त करण्याचे आदेश कोर्टाने दिले आहेत.

कृष्णा आंधळेची संपत्ती जप्त करण्याची परवानगी द्यावी असा अर्ज सीआयडीच्या अधिकाऱ्यांनी न्यायालयाकडे केला होता. तसंच याबाबतची माहिती देखील सादर केली होती. यामध्ये कृष्ण आंधळे यांच्याकडे ५ विविध प्रकारची वाहने असून धारूर आणि केज येथील बँकेत तीन खाते देखील आहेत. सदरची संपत्ती जप्त करण्याचे आदेश कोर्टाने दिले असून त्यानुसार कारवाई सुरू करण्यात आली आहे.

संतोष देशमुख हत्या प्रकरणातील आरोपी कृष्णा आंधळेला दोन वेळा फरार घोषित करण्यात आले आहे. तरी देखील तो अजूनही पोलिसांच्या हाती लागला नाही. संतोष देशमुखांच्या हत्येनंतर सर्व आरोपी एकाच वाहनातून वाशीपर्यंत गेले. त्यानंतर ती कार त्याच ठिकाणी सोडून हे सर्व आरोपी फरार झाले होते. याप्रकरणातील इतर सर्व आरोपींच्या मुसक्या पोलिसांनी आवळल्या. पण अद्याप कृष्णा आंधळे सापडला नाही. तो फरार असून ६५ दिवस उलटले तरी त्याचा तपास लागला नाही.