Santosh Deshmukh Case : 'आंधळे' कारभार! CCTV फुटेज मिळाल्यानंतर धनंजय देशमुख यांना वेगळाच संशय

बीड : मस्साजोग सरपंच संतोष देशमुख यांच्या हत्येला दोन महिन्यांपेक्षा अधिकचा कालावधी उलटूनही आरोपी कृष्णा आंधळे अजूनही मोकाट आहे. याबाबत रोज नवनवीन खुलासे होत आहेत. या सर्व तपासावर आज, मंगळवारी संतोष देशमुख यांचे बंधू धनंजय देशमुख यांनी प्रश्नचिन्ह निर्माण केले आहे.

पत्रकारांना हे सीसीटीव्ही फुटेज सापडते. पण पोलिसांना ते का सापडत नाही? जर वेळेत सीसीटीव्ही फुटेज ताब्यात घेतले असते तर आरोपींच्या हालचालींबाबत महत्त्वाची माहिती मिळाली असती. अजूनही मुख्य आरोपी कृष्णा आंधळे मोकाट आहे. तोच या फुटेजमध्ये पळताना स्पष्ट दिसत आहे आतापर्यंत पाच ते सहा सीसीटीव्ही फुटेज समोर आले आहेत. पण ते पोलिसांनी वेळेत घेतले नाही. जर ते वेळेवर घेतले असते तर आरोपी कुठे पळून गेले आहेत याचा तपास लागला असता, असं सांगतानाच धनंजय देशमुख यांनी पोलीस तपासावर संशय व्यक्त केला.

सीआयडी आणि एसआयटीचा तपास चांगला सुरू आहे. सीसीटीव्ही फुटेज आणि पोलीस यंत्रणा नेमका काय तपास करत आहे ते आमच्यासमोर मांडा, अशी मागणीही देशमुख यांनी केली.धनंजय देशमुख यांनी प्रशासनावरही नाराजी व्यक्त करत अनेक सवाल उपस्थित केले. तपास नीट करण्याऐवजी प्रशासन आंदोलन दडपण्यावर अधिक भर देत आहे. आरोपी पोलिसांसमोरून पळून जात असतील तर त्यांना शोधणार कोण? कृष्णा आंधळे देखील सीसीटीव्हीमध्ये स्पष्ट दिसत असतानाही त्याला अटक झाली नाही. हे अत्यंत दुर्दैवी आहे, असे ते म्हणाले.

मोबाईल कॉल डिटेल्स काढा आणि पहिल्या चार-पाच दिवसांत काय झाले याचा तपशील उघड करा. जर सुरुवातीचा तपास योग्य प्रकारे झाला असता तर आज सर्व आरोपी गजाआड असते आणि त्यांना शिक्षा झाली असती. मात्र काहींना मिळालेल्या अभयामुळे आरोपी अजूनही मोकाट आहेत. त्यामुळे या प्रकरणाचा तपास नव्याने करण्यात यावा, अशी मागणीही देशमुख यांनी केली आहे.