Badlapur Case: 'बदलापूरचे आंदोलन राजकीय स्टंट, विरोधकांनी CM शिंदेंचा दावा खोडला, संजय राऊत, वडेट्टीवारांनी थेट पुरावे दाखवले!

मुंबई, ता. २२ ऑगस्ट २०२४

बदलापूरमध्ये घडलेल्या दोन चिमुकलींवरील अत्याचाराच्या घटनेने राज्यभरात संतापाची लाट उसळली आहे. या घटनेनंतर बदलापूरकरांचा आक्रोश पाहायला मिळाला. नागरिकांनी रस्त्यावर उतरत ठिय्या आंदोलन करत पोलीस प्रशासनाला धारेवर धरले. मात्र हे आंदोलन राजकीय प्रेरीत असल्याचा आरोप मुख्यमंत्री एकनाथ शिंदे यांच्यासह महायुतीमधील बड्या नेत्यांनी केला. यावरुनच विरोधकांनी संताप व्यक्त केला असून आता थेट पुरावेच दाखवले आहेत.

विजय वडेट्टीवार यांनी पुरावे दाखवले!

बदलापूरचे आंदोलन हे विरोधकांचे कारस्थान असल्याचा आरोप मुख्यमंत्री एकनाथ शिंदे यांनी केला होता. मुख्यमंत्र्यांच्या या दाव्यावरुन विधानसभेचे विरोधी पक्षनेते विजय वडेट्टीवार यांनी संताप व्यक्त केला असून पोलिसांच्या कारवाईची महत्वाची कागदपत्रे शेअर केली आहेत. शिंदे- फडणवीस- अजित पवार सरकारचे अजून एक फेक नरेटिव्ह, असे म्हणत त्यांनी हे ट्वीट केले आहे.

आंदोलक बदलापूरचेच

"बदलापूर प्रकरणी केलेले आंदोलन हे राजकीय दृष्ट्या प्रेरित होते. यातील आंदोलनकर्ते बदलापूरच्या बाहेरचे होते हा आरोप करणाऱ्या सत्ताधाऱ्यांनी पोलिसांची रिमांड कॉपी बघावी, असे विजय वडेट्टीवार यांनी म्हटले आहे. अटक केलेल्या सगळे आंदोलकांचे पत्ते बदलापूरचे आहे. या सरकारला फक्त स्वतःची पाठ थोपटून घ्यायची आहे, पण सरकारवर एखादा आरोप झाला की लगेच विरोधकांना दोष द्यायचा. स्वतः मात्र कोणत्याच घटनेची जबाबदारी घ्यायची नाही, अशी टीका त्यांनी केली आहे.

संजय राऊतही संतापले!

दरम्यान, यावरुनच शिवसेना ठाकरे गटाचे खासदार संजय राऊत यांनीही थेट गृहमंत्र्यांवर निशाणा साधला आहे. "देवेंद्र फडणवीस जी, उघडा डोळे, बघा नीट! बदलापूर आंदोलकांचे हे पोलीस रिमांड एप्लीकेशन आहे. सर्व आंदोलक बदलापूरचेच आहेत. आपले मंत्री सांगत होते आंदोलक भाडोत्री आणि बाहेरची आहेत! काय लायकीची माणसं आपल्या मंत्रीमंडळात आहेत," असा टोला त्यांनी लगावला आहे.