Maharashtra Politics: काय योगायोग! ३४ वर्षांपूर्वी 'बाप'माणसांची एकाच वेळी विधानभवनात एन्ट्री, आता त्यांच्या मुलांचीही ग्रँड एन्ट्री, फोटो व्हायरल

विजय पाटील, साम टीव्ही, सांगली

काय योगायोग आहे, असं आपण अनेपक्षित घडणाऱ्या घटनांवर बोलतो. योगायोग कुठून, कधी आणि कसा जुळून येईल सांगता येत नाही. आता राजकारणात घडलेला हा योगायोगच बघा. वडिलांप्रमाणे चिरंजीवांनीही प्रथमच आमदार म्हणून विधानभवनात एकत्र प्रवेश केला. १९९० साली दिवंगत नेते आणि माजी गृहमंत्री आर. आर पाटील आणि अनिल बाबर यांनी प्रथम आमदार झाल्यानंतर विधानभवनात एकत्र प्रवेश केला होता.

तसेच दोघांचे चिरंजीव रोहित पाटील आणि सुहास बाबर यांनी आज प्रथमच त्याच डॅशिंग अंदाजात विधानभवनात प्रवेश केला. त्यामुळे एक अनोखा योगायोग आणि १९९० सालची एकप्रकारे पुनरावृत्ती झाली असल्याचं बोललं जातंय. तासगाव आणि खानापूर आटपाडी ही अगदी शेजारची गावं. या मतदारसंघात आर. आर पाटील आणि अनिल बाबर हे दोघेही दमदार आमदार होते. मात्र, आज दोघेही हयात नाहीत. त्यांनी या मतदारसंघातील कामं चोखपणे बजावली. ज्याची दखल अख्ख्या महाराष्ट्राने घेतली आहे.

दिवंगत नेते आणि माजी मंत्री आर. आर पाटील आणि अनिल बाबर यांनी १९९० मध्ये पहिल्यांदा विधानसभा निवडणुकीत विजय मिळवला होता. तासगाव विधानसभा मतदारसंघातून आर. आर पाटील तर, खानापूर आटपाडी विधानसभा मतदारसंघातून अनिल बाबर यांनी निवडणूक लढवून आमदारकीच्या विजयाची माळ गळ्यात घातली होती. त्यानंतर दोघांनी विधानभवनामध्ये एकत्रितच प्रवेश केला होता.

आज त्यांचेच वारसदार असलेले नवनिर्वाचित आमदार रोहित पाटील आणि आमदार सुहास बाबर यांनी त्याच अंदाजात एकत्रित विधानभवनात प्रवेश केला. या दोघांच्या एकत्रित आगमनानंतर, आर. आर पाटील आणि अनिल बाबर यांची सगळ्यांना आठवण झाली. अनेकांनी सोशल मीडियावर तशा प्रतिक्रिया दिल्या. रोहित पाटील हे तासगाव कवठेमहांकाळ मतदारसंघातून तर सुहास बाबर हे खानापूर विधानसभा मतदारसंघातून आमदार म्हणून प्रथमच निवडून आले आहेत.