Snake Bite : १५ दिवसात सर्पदंशाने तीन शेतकऱ्यांचा मृत्यू; तळोदा तालुक्यातील घटना

सागर निकवाडे 

नंदुरबार : पावसाळ्याच्या दिवसात साप बाहेर येत असतात. या काळात शेतात काम करत असताना किंवा अडगडीच्या ठिकाणी बसलेले साप दंश करत असतात. प्रामुख्याने पावसाळ्यात अशा घटना अधिक घडत असतात. दरम्यान नंदुरबारच्या तळोदा तालुक्यात मागील पंधरा दिवसात सर्पदंश होऊन तीन शेतकऱ्यांचा मृत्यू झाल्याच्या घटना घडल्या आहेत.  

तळोदा (Taloda) तालुक्यातील ग्रामीण भागात मुसळधार पावसानंतर काही दिवसांपासून पावसाने उघडीप दिली असून परिसरात दमट वातावरण तयार झाले आहे. या दमट वातावरणामुळे विषारी साप बाहेर यायला सुरुवात झाली आहे. पावसाळ्यात जमिनीखाली पाणी गेल्याने अन्नाचा शोधात साप बाहेर पडत असतात. बऱ्याचदा साप घराच्या आवारात, झाडावर देखील येत असतात. इतकेच नाही तर कौलारू घर किंवा पत्राचे शेड टाकलेल्या घराच्या छतावर देखील साप जात असतात. यामुळे या काळात अशा प्रकारे दबा धरून बसलेले साप दंश (Snake Bite) करत असल्याच्या घटना वाढत असतात. 

तीन शेतकऱ्यांचा मृत्यू 

शेतकरी (Farmer) हा आपल्या दैनंदिन कामात असल्यामुळे शेतात काम करताना सर्पदंशांचा घटनांमध्ये वाढ झाली असून गेल्या १५ दिवसात तीन शेतकऱ्यांचा सर्प दंशाने मृत्यू झालेला आहे. सर्पदंशाचे मृत्यू होण्याचा दुर्घटना टाळण्यासाठी निसर्गप्रेमींकडून सर्पदंश प्रथमोपचार आणि संदर्भसेवा याबाबत जनजागृती मोहीम राबवण्याची गरज निर्माण झाली आहे.