धाड धाड...! गावठी कट्ट्याने शेतात काम करणार्‍यावर गोळीबार; पोलीस तातडीने घटनास्थळी

सागर निकवाडे,साम टीव्ही

राज्यात गोळीबाराच्या घटना सुरूच आहेत. पुण्यातील राजगड तालुक्यात गोळीबाराची घटना ताजी असताना नंदूरबारमधूनही गोळीबाराची घटना उघडकीस आली आहे. नंदूरबार शहरालगत असलेल्या बिलाडी शिवारात गोळीबाराची घटना घडली. गावठी कट्ट्याने शेतात काम करणाऱ्या एका व्यक्तीवर गोळीबार करण्यात आला आहे. गोळीबाराच्या घटनेने परिसरात खळबळ उडाली आहे.

नंदूरबारमध्ये झालेला गोळीबार हा आर्थिक वादातून झाल्याचे समोर आलं आहे. नंदूरबारच्या बिलाडी शिवारात गोळीबार झाल्यानंतर पोलीस आणि श्वानपथक तातडीने घटनास्थळी पोहोचले. गोळीबार झालेल्या घटनास्थळाची पोलीस अधीक्षक अश्विनी सानप यांनी पाहणी केली. घटनास्थळी पोलिसांना गोळी झाडल्याचे पुरावे आढळले आहेत. पोलीस ॲक्शन मोडवर येत दोन जणांना ताब्यात घेतलं.

गोळीबारासाठी गावठी कट्टा कुठून आला, या संदर्भात पोलिसांकडून सखोल तपास सुरू आहे. सण उत्सवाच्या पार्श्वभूमीवर कोणीही अफवा न पसरवण्याचं पोलीस अधीक्षकांनी आवाहन केलं आहे.

पोलीस अधीक्षक अश्विनी सानप यांनी सांगितलं की, 'नंदूरबार तालुका पोलीस स्टेशनच्या हद्दीत गोळीबाराची घटना घडली. या घटनेची माहिती मिळताच मी घटनास्थळी पोहोचले. ही जागा नंदूरबार तालुका पोलीस स्टेशनच्या हद्दीत येते. या परिसरात गोळीबार झाल्याचे पुरावे मिळत आहेत. प्राथमिक माहितीनुसार, आर्थिक संबंधातून ही गोळीबाराची घटना घडली आहे, असं प्रशमदर्शनी दिसून येत आहे. पोलीस तपास सुरू आहे.

'पीडित व्यक्तीचा जबाब घेण्याचे काम सुरू आहे. त्यानुसार कायदेशीर कारवाई केली जाणार आहे. माझं नागरिकांना आवाहन आहे की, कोणत्याही प्रकारच्या अफवांवर विश्वास ठेवू नका. या प्रकरणी कारवाई सुरू असून आरोपींवर कडक कारवाई करण्यात येईल. सण-उत्सवाच्या पार्श्वभूमीवर कोणीही अफवा पसरवू नये, असं आवाहन पोलीस अक्षीक्षकांनी केलं.