Bhimashankar Temple: श्रावणात भाविकांना मोठा दिलासा; पाच महिन्यांनंतर श्री क्षेत्र भीमाशंकर मंदिर पूर्णवेळ खुलं

श्रावण महिन्याच्या पार्श्वभूमीवर शिवभक्तांसाठी मोठी दिलासादायक बातमी समोर आलीये. गेल्या पाच महिन्यांपासून विविध कारणांमुळे बंद असलेलं पुणे जिल्ह्यातील श्री क्षेत्र भीमाशंकर मंदिर आता भाविकांसाठी पूर्णवेळ खुलं राहणार आहे. गेल्या दोन महिन्यांपासून मंदिरात केवळ मर्यादित वेळेत दर्शनाची सुविधा उपलब्ध होती. मात्र श्रावणातील वाढणारी भाविकांची गर्दी लक्षात घेऊन दर्शनाची वेळ आता वाढवण्यात आली आहे.

पहाटे पाच वाजता पूजा झाल्यानंतर मंदिर भाविकांसाठी खुलं करण्यात येणार असून रात्री दहा वाजेपर्यंत दर्शन घेता येणार आहे. त्यामुळे दूरवरून भीमाशंकरच्या दर्शनासाठी येणाऱ्या भाविकांना मोठा दिलासा मिळणार आहे.

श्री क्षेत्र भीमाशंकर हे भगवान शंकराच्या बारा ज्योतिर्लिंगांपैकी एक असून धार्मिकदृष्ट्या अत्यंत महत्त्वाचं तीर्थक्षेत्र मानलं जातं. सह्याद्रीच्या घनदाट जंगलात वसलेल्या या मंदिराला धार्मिक महत्त्वासोबतच ऐतिहासिक आणि नैसर्गिक वारसाही लाभला आहे. मंदिराची वास्तू नागर शैलीतील असून, परिसरातील कोरीवकाम आणि शिल्पकला विशेष आकर्षण ठरतं.

श्रावण महिन्यात विशेषतः श्रावणी सोमवारच्या दिवशी भीमाशंकरमध्ये भाविकांची मोठी गर्दी होत असते. दर्शनासाठी लांबच लांब रांगा लागतात. यापूर्वी मर्यादित दर्शन वेळेमुळे भाविकांची गैरसोय होत होती. आता मंदिर दिवसभर खुलं राहणार असल्याने गर्दीचं व्यवस्थापन करण्यासही मदत होण्याची शक्यता आहे.

भीमाशंकर परिसर धार्मिक पर्यटनासोबतच निसर्ग पर्यटनासाठीही प्रसिद्ध आहे. मंदिराभोवती असलेले घनदाट जंगल आणि भीमाशंकर अभयारण्यामुळे या भागाचे महत्त्व आणखी वाढते. महाराष्ट्राचा राज्यप्राणी असलेला शेकरू या परिसरात आढळतो. त्यामुळे श्रावणात महादेवाच्या दर्शनासोबतच निसर्गरम्य भीमाशंकरचा अनुभव घेण्यासाठीही भाविक आणि पर्यटक मोठ्या संख्येने दाखल होण्याची शक्यता आहे.