Maharashtra News Live Update : मध्य रेल्वे विस्कळीत, लोकल २० मिनिटे उशिराने

छत्रपती शिवाजी महाराज टर्मिनसकडे जाणाऱ्या जलद लोकल सेवा 20 ते 25 मिनिटे उशिराने धावत आहेत. तर धिम्या लोकल सेवा 10 ते 15 मिनिटे उशिराने असल्याने स्थानकांवर प्रवाशांची मोठी गर्दी जमली आहे.

हिंगोली नरसी राज्य मार्गावर अपघाताच्या घटने नंतर महसूल प्रशासनातील वरिष्ठ अधिकाऱ्याची तत्परता पाहायला मिळाली आहे, हिंगोलीचे उपविभागीय अधिकारी समाधान घुटुकडे यांनी अपघातग्रस्त दोघांना शासकीय गाडी मधून रुग्णालयात दाखल केले आहे, जखमी अवस्थेत रस्त्यावर पडलेल्या दोघांना रुग्णालयात घेऊन जाण्यासाठी नागरिक रुग्णवाहिकेची वाट पाहत असताना वरिष्ठ महसूल अधिकाऱ्यांनी वेळीच इतर शासकीय कामकाज बाजूला ठेवत जखमींना रुग्णालयात दाखल केल्यामुळे डॉक्टरांनी तातडीने उपचार केले आहेत तर अपघातात जखमी झालेल्या जितेश पवार व शंकर पवार या दोघांचे प्राण देखील बचावले आहेत

कुडाळ तालुक्यातील निरुखे सुतारवाडी येथे बेकायदेशीर रीत्या सुरू असलेल्या बंदूक निर्मितीच्या कारखान्यावर स्थानिक गुन्हे अन्वेषण शाखेने टाकलेल्या धाड प्रकरणात अन्य चौघांना कुडाळ पोलिसांनी ताब्यात घेऊन अटक केली त्यांना न्यायालयात हजर केले असता न्यायालयाने एक दिवसाची पोलिस कोठडी सुनावली. निरुखे सुतारवाडी येथे बेकायदेशीररित्या सुरू असलेल्या बंदूक निर्मितीच्या कारखान्यावर स्थानिक गुन्हे अन्वेषण शाखेने सोमवारी रात्री धाड टाकली या कारवाईत सात बंदुका आणि बंदूक बनविण्याचे साहित्य असा एकूण १ लाख १४ हजार ६०० रुपयांचा मुद्देमाल जप्त करण्यात आला

यावर्षी यवतमाळ जिल्ह्यात वार्षिक सरासरी पेक्षा अधिक पाऊस झाला यानंतरही जिल्ह्याची भूजल पातळी झपाट्याने खाली गेली. गत पाच वर्षाच्या तुलनेत जिल्ह्यातील भूजल पातळी 0.59 टक्क्याने खाली गेल्याची नोंद भूजल सर्वेक्षण विभागाने केली आहे.