Maharashtra Politics : महायुतीचं टेन्शन वाढणार, महाविकास आघाडीचा मोठा डाव; विधानसभेसाठी उद्धव ठाकरेंना दिली महत्वाची जबाबदारी, VIDEO

मुंबई : राजकीय वर्तुळातून एक मोठी बातमी समोर आली आहे. आगामी विधानसभा निवडणुकीसाठी महाविकास आघाडीने बैठकांचा सपाटा लावला आहे. महाविकास आघाडीतील घटकपक्षांनी मतदारसंघाची चाचपणी देखील सुरु केली आहे. याचदरम्यान, महाविकास आघाडीच्या निवडणुकीच्या प्रचारप्रमुखपदाची जबाबदारी उद्धव ठाकरे यांना दिली आहे, अशी माहिती सूत्रांनी दिली आहे. महाविकास आघाडीच्या प्रचारप्रमुखपदी उद्धव ठाकरेंची नियुक्ती केल्याने महायुतीचं टेन्शन वाढण्याची शक्यता असल्याचं बोललं जात आहे.

सूत्रांनी दिलेल्या माहितीनुसार, महाविकास आघाडीच्या प्रचाराचे प्रमुखपदाची जबाबदारी उद्धव ठाकरे यांना दिली आहे. यामुळे उद्धव ठाकरे यांच्यात नेतृत्वात राज्यात विधानसभेचा प्रचार होणार आहे. पण मुख्यमंत्रिपदाचा चेहरा म्हणून उद्धव ठाकरे यांचं नाव आताच जाहीर होणार नसल्याची माहिती मिळाली आहे. निवडणुकीनंतर मुख्यमंत्री कोण हे ठरवलं जाणार आहे.

महाविकास आघाडीचं सरकार असताना उद्धव ठाकरे यांनी केलेलं काम आणि नेतृत्व यामुळे त्यांच्याच हाती सूत्र देण्याचा निर्णय घेण्यात आल्याची माहिती मिळाली आहे. काँग्रेसच्या हायकमांडने राज्यातील काँग्रेस नेत्यांना माहिती दिली आहे. तसेच इंडिया आघाडीत असणाऱ्या इतर छोट्या पक्षांना देखील आघाडीत सामावून घेण्यासाठी प्रयत्न करण्याच्या सूचना हायकमांडने काँग्रेस नेत्यांना दिल्या आहेत.

महाविकास आघाडीच्या पुढील काही दिवसांत २ सभा

आगमी विधानसभा निवडणुकीला महाविकास आघाडी एकत्र सामोरे जाणार आहे. तर या पार्श्वभूमीवर महाविकास आघाडीच्या तिन्ही प्रमुख नेते आणि कार्यकर्त्यांची १६ तारखेला सभा होणार आहे. त्यातून उत्तम समन्वय असावा, यासाठी बैठक सभेचं आयोजन करण्यात आल्याची माहिती विजय वडेट्टीवार यांनी दिली आहे. या बैठकीत जागा वाटपाची चर्चा होईल. तसेच जागावाटपाचे सूत्र देखील ठरणार आहे, अशीही माहिती वडेट्टीवर यांनी दिली.