कल्याण-डोंबिवली महानगरपालिकेच्या उंबरडे डंपिंग ग्राउंडची भाजप आमदार सुलभा गायकवाड यांनी पाहणी केली. या पाहणीदरम्यान डंपिंग ग्राउंडवरील ठेकेदाराच्या कामात अनेक त्रुटी असल्याचे आरोप करण्यात आले. कर्मचाऱ्यांकडे ओळखपत्रं आणि आवश्यक सुरक्षा साधनं नसणं, तसंच कचरा वेचण्याच्या कामात बालकांचा समावेश असल्याचं समोर आल्याचा दावा करण्यात आला. त्यामुळे डंपिंग ग्राउंडवरील कामकाजाबाबत प्रश्न उपस्थित होत आहेत.
डंपिंग ग्राउंडमध्ये वापरण्यात येणाऱ्या वाहनांची आवश्यक कागदपत्रंही उपलब्ध नसल्याचा आरोप करण्यात आला. कर्मचाऱ्यांच्या सुरक्षेसाठी आवश्यक असलेल्या साधनांचा अभाव आणि वाहनांच्या कागदपत्रांबाबतच्या या आरोपांमुळे ठेकेदाराच्या कामकाजावर प्रश्नचिन्ह निर्माण झालंय. या सर्व बाबींची जबाबदारी नेमकी कोणाची, असा सवालही उपस्थित होत आहे.
डंपिंग ग्राउंडच्या पाहणीदरम्यान आणखी एक वादग्रस्त प्रकार घडल्याची माहिती समोर आलीये. आमदार सुलभा गायकवाड यांच्या समर्थकांपैकी विजय जोशी यांनी डंपिंग ग्राउंडच्या सुपरवायझरला मारहाण केल्याचं सांगण्यात येतंय. सुपरवायझरने मद्यप्राशन केले असल्याचा आरोप करत ही मारहाण करण्यात आल्याची माहितीये.
विशेष म्हणजे, आमदार सुलभा गायकवाड आणि केडीएमसीचे उपायुक्त डॉ. रामदास कोकरे यांच्यासमोरच हा प्रकार घडल्याचा दावा करण्यात आला आहे. त्यामुळे या घटनेचीही चर्चा सुरू झाली आहे.
उंबरडे डंपिंग ग्राउंडवरील कामकाजात त्रुटी असल्याचे आरोप गंभीर आहेत. कर्मचाऱ्यांकडे ओळखपत्रं आणि सुरक्षा साधनं नसणे, वाहनांची आवश्यक कागदपत्रे उपलब्ध नसणं आणि बालकांकडून कचरा वेचण्याचे काम करून घेतलं जात असल्याचा आरोप या बाबींची चौकशी होणं गरजेचं आहे. या प्रकरणात संबंधित ठेकेदारावर कारवाई होणार का, असा प्रश्न उपस्थित होत आहे.
सुपरवायझरने मद्यप्राशन केलं असल्याचा आरोप करण्यात आला असला तरी त्याची खातरजमा करून नियमानुसार कारवाई करणं अपेक्षित आहे. मात्र या आरोपावरून सुपरवायझरला मारहाण करणं कितपत योग्य आहे, असा सवालही उपस्थित केला जातोय.
आता डंपिंग ग्राउंडवरील अनियमिततांची चौकशी करून संबंधित ठेकेदारावर कारवाई केली जाणार का? कर्मचाऱ्यांच्या सुरक्षेसाठी आवश्यक उपाययोजना केल्या जाणार का? तसंच सुपरवायझरला मारहाण केल्याच्या आरोपाची प्रशासन दखल घेणार का? याकडे सर्वांचे लक्ष लागलंय.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.