राज्य उत्पादन शुल्क विभागाच्या पथकावर हल्ला; दगडफेक करून तस्कर फरार

सागर निकवाडे, साम टीव्ही

नंदुरबार जिल्ह्यातील धडगाव तालुक्यात अवैध दारूवर कारवाई करण्यासाठी गेलेल्या राज्य उत्पादन शुल्क विभागाच्या पथकावर जमावाने हल्ला केल्याची खळबळजनक घटना घडलीये. निगदी फाटा परिसरात आरोपींनी पथकावर दगडफेक करत जप्त केलेली दारू आणि वाहन बळजबरीने पळवून नेले.

मिळालेल्या माहितीनुसार, निरीक्षक राजेश सपकाळ यांच्या पथकाने निगदी शिवारात छापा टाकला. पथकाने 19 लाख 40 हजार रुपये किमतीचा मुद्देमाल जप्त केला होता. यामध्ये विदेशी दारूचे 200 बॉक्स आणि एका पिकअप वाहनाचा समावेश होता. मात्र, कारवाई सुरू असतानाच बुधा झांगडे आणि सुरेश झांगडे यांच्यासह 10 ते 12 जणांच्या जमावाने पथकाला घेरले.

वाहन पुढे नेल्यास जिवंत सोडणार नाही, अशी धमकी देत आरोपींनी जोरदार दगडफेक केली. जप्त केलेला मुद्देमाल बळजबरीने लुटून नेला. या घटनेमुळे जिल्ह्यात खळबळ उडाली आहे. या घटनेने शासकीय कर्मचाऱ्यांच्या सुरक्षेचा प्रश्न ऐरणीवर आला आहे. धडगाव पोलीस ठाण्यात आरोपींविरुद्ध विविध कलमान्वये गुन्हा दाखल करण्यात आलेला आहे.

पंढरपुरात नातवाकडून आजोबा आणि आत्याला मारहाण

पंढरपूरच्या करमाळा तालुक्यातील शेलगाव वांगी येथे नातवाकडून आजोबाला आणि आत्याला मारहाण करण्यात आल्याची घटना घडली. या मारहाणीचा व्हिडीओ सोशल मीडियावर व्हायरल झाला आहे. शेतीच्या कारणावरून भांडण झाल्याची माहिती मिळत आहे. करण भालचंद्र केकाण, मयूर विशाल केकाण,विशाल महादेव केकाण आणि एक जण अनोळखी अशा चार जणांविरुद्ध करमाळा पोलिसांत गुन्हा दाखल करण्यात आला आहे.