पिंपरी-चिंचवडमध्ये अजित पवारांचं स्मारक उभारण्यात येणार? आमदार महेश लांडगे यांचं महापालिका आयुक्तांना पत्र

अजित पवारांच्या निधनाने राज्यभर शोककळा पसरली आहे. अजित पवारांच्या कुटुंबासह कार्यकर्त्यांवरही दु:खाचा डोंगर कोसळला आहे. अजितदादांच्या जाण्याने पुणे, पिंपरी-चिंचवडमध्येही दु:खाचं वातावरण पसरलं आहे. विविध भागात अजित पवारांना श्रद्धांजली वाहिली जात आहे. याचदरम्यान पिंपरी-चिंचवडमध्ये अजित पवारांचं स्मारक उभारण्यात यावं, यासाठी आमदार महेश लांडगे यांनी महापालिका आयुक्तांना पत्र लिहिलं आहे.

दिवंगत उपमुख्यमंत्री अजित पवार यांचं पिंपरी चिंचवड महापालिकेच्या नव्या इमारतीसमोर पूर्णाकृती ब्राँझ धातूचा पुतळा उभारून स्मारक उभारण्यात यावं, नवीन सभागृहाला अजित पवार यांचे नाव देऊन आधुनिक तंत्रज्ञानाचा वापर करून अजितसृष्टी उभारण्यात यावी. या मागणीसाठी भोसरी विधानसभाचे भारतीय जनता पक्षाचे आमदार महेश लांडगे यांनी पिंपरी चिंचवड महापालिका आयुक्त श्रावण हर्डीकर यांना एक पत्र लिहिलं आहे.

पिंपरी-चिंचवड महापालिका निवडणुकीत उपमुख्यमंत्री अजित पवार आणि महेश लांडगे यांनी एकमेकांवर अतिशय कठोर शब्दात टीका केली होती. मात्र अजित पवार यांच्या अकाली निधनानंतर महेश लांडगे यांनी पिंपरी चिंचवड आयुक्त श्रावण हर्डीकर यांना लिहिलेलं पत्र सध्या पिंपरी चिंचवड शहरात चर्चेचा विषय बनला आहे.

पिंपरी-चिंचवड शहराच्या इतिहासामध्ये लोकनेते दिवगंत मुख्यमंत्री अजित पवार यांचे योगदान अत्यंत मोलाचे आणि अविस्मरणीय राहील आहे. शहराच्या विकासाच्या प्रक्रियेत, औद्योगिक प्रगती तसेच नागरी प्रशासनाशी संबंधित विविध निर्णयामध्ये त्यांची भूमिका महत्त्वाची ठरली आहे. या प्रकारचा उल्लेख महेश लांडगे यांनी महापालिका आयुक्तांना लिहिलेल्या पत्रात केला आहे.