Voter List Fraud: व्होट चोरीचा आणखी एक पुरावा; बदलापूरमध्ये १७ हजार बाहेरील मतदार

बदलापूर पालिकेच्या आगामी निवडणुकीसाठी जाहीर झालेल्या मतदार यादीत शहराबाहेरील 17 हजार मतदारांची नावं असून हे मतदार मतदान करायला आले तर त्यांना चोप देऊ, असा इशारा शिवसेना शहरप्रमुख वामन म्हात्रे यांनी दिला आहे. बदलापूरमध्ये प्रत्येक प्रभागात एकाच नावाच्या अनेक मतदारांची नोंदणी करण्यात आली असून दुबार मतदारांची संख्या मोठी आहे. तर बदलापूर शहरालगतच्या ग्रामीण भागातील तब्बल 17 हजार मतदारांची नावं बदलापूर शहराच्या मतदार यादीत टाकण्यात आली आहेत.

खोटे डॉक्युमेंट देऊन या मतदारांची नावं बदलापूर शहराच्या यादीत टाकण्यात आली असून याबाबत निवडणूक आयोगाला तक्रार करण्यात आलीय. या सर्व मतदारांसह त्यांची नावं टाकणाऱ्यांवर देशद्रोहाचा गुन्हा दाखल करावा, अशी मागणी बदलापूरचे शिवसेना शहरप्रमुख वामन म्हात्रे यांनी केलीय.

सध्या देशभरात व्होट चोरीच्या मुद्द्यावरून राजकारण चांगलेच तापले आहे. लोकसभेचे विरोधीपक्ष नेते राहुल गांधी यांनी देखील अनेक मोठमोठे पुरावे दाखवत निवडणूक आयोगावर गंभीर आरोप केले आहे. राज्यातील विरोधी पक्षांनी देखील राज्य निवडणूक आयोगाची भेट घेतली होती. त्यानंतर राज ठाकरे यांनी देखील महाराष्ट्रातील अनेक ठिकाणी मतदार याद्यांमध्ये घोळ झाल्याचे पुरावे दिले आहे.दिवसागणिक मतदार यादीमधील झालेला फेरबदल आणि विधानसभा निवडणुकीत झालेले घोळ याचे अनेक पुरावे आता विरोधी पक्षाचे नेते समोर आणत असताना आता बदलापूरमध्ये देखील धक्कादायक प्रकार घडला आहे.

यामध्ये मलंगगड, बारवी परिसर, मुरबाड, शेलु, नेरळ, वांगणी, भिवंडी, शहापूर, कर्जत आणि आसपासच्या ग्रामीण भागातल्या मतदारांचा मोठ्या प्रमाणात समावेश असल्याची माहितीही म्हात्रे यांनी दिलीय. तसंच हे मतदार जर मतदानाच्या दिवशी बोगस मतदान करायला आले, तर त्यांना चोप देऊ असा इशारा शिवसेना शहरप्रमुख वामन म्हात्रे यांनी दिला आहे. मतदानाच्या दिवशी जर कायदा सुव्यवस्थेचा प्रश्न निर्माण झाला, तर त्याची जबाबदारी निवडणूक आयोगाची असेल, असंही वामन म्हात्रे म्हणाले आहेत.