हिंगोली, नांदेड आणि परभणी हे जिल्हे भूकंपानं हादरले. हिंगोलीतील औंढा नागनाथसह वसमत तालुक्यात भूकंपाचे धक्के जाणवले. तर परभणी आणि नांदेडमध्येही भूकंपाचे हादरे जाणवले. नांदेडसह परभणीत झालेल्या भूकंपाची तीव्रता ही 4.2 रिश्टर स्केल इतकी होती...भूकंपाचा केंद्रबिंदू आखाडा बाळापूरपासून 13 किमीवरील दांडेगाव परिसर असल्याचे सांगितले जात आहे. सुदैवाने यामध्ये कोणतीही वित्तहानी अथवा जीवितहानी झाली नसल्याची माहिती समोर येत आहे.
मराठवाड्यात 30 सप्टेंबर 1993 रोजी पहाटे 3 वाजून 56 मिनिटांनी झालेल्या भूकंपाने तांडव माजलं होतं. या भूकंपाचे केंद्र सोलापूरच्या ईशान्येस 70 किमी अंतरावर किल्लारीजवळ होतं. रिश्टर स्केलवर या भूकंपाची तीव्रता 6.04 मोजली गेली होती. या धक्क्यात हजारो लोकं, जनावरांचा मृत्यू झाला. तर तितकेच लोक जखमी झाले. तेव्हाच्या उस्मानाबाद आणि आत्ताच्या धाराशीव जिल्ह्यातील उमरगा आणि लातूर जिल्ह्यातील औसा तालुक्यात सर्वाधिक नुकसान झालं होतं. ही जखम आजच्या भूकंपाने पुन्हा एकदा ओली झालीये.
दरम्यान, भूकंपाचे धक्के जाणवल्यानं नागरिकांमध्ये भीतीचं वातावरण पसरलं. नागरिकांनी घाबरून जाऊ नये असे आवाहन प्रशासनाकडून करण्यात आलंय. मात्र बुधवारच्या भूकंपानं किल्लारीच्या कटू आठवणींनी अनेकांच्या काळजात धस्सं झालं.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.