धुळे हादरलं! कर्तव्यावर असलेल्या पोलिसांना गावगुंडांची बेदम मारहाण; थरारक व्हिडिओ व्हायरल

भूषण अहिरे, साम टीव्ही

धुळे: ग्रामीण रुग्णालयात शासकीय कर्तव्य बजावत असलेल्या पोलिस कर्मचाऱ्यांनाच बेदम मारहाण केल्याचा धक्कादायक प्रकार साक्री तालुक्यातील जैताने येथे समोर आला आहे. या मारहाणीचा आणि धक्काबुक्कीचा व्हिडिओ सध्या सोशल मीडियावर मोठ्या प्रमाणात व्हायरल झाला असून यामध्ये पोलिसांनाच काही जणांकडून धक्काबुक्की आणि मारहाण केली जात असल्याचा प्रकार स्पष्टपणे दिसून येत आहे. यासंदर्भात पोलिसांवर हल्ला करणाऱ्या चौघांविरुद्ध निजामपूर पोलिस ठाण्यात गुन्हा दाखल करण्यात आला आहे.

साक्री तालुक्यातील जैताने ग्रामीण रुग्णालयात मध्यरात्रीच्या सुमारास काही जण आपापसात वाद घालत असल्याची माहिती पोलिसांना मिळाली. त्यानुसार कर्तव्यावर असलेले पोलिस कर्मचारी तातडीने घटनास्थळी दाखल झाले. त्यांनी रुग्णालयातील शांतता अबाधित राखण्यासाठी उपस्थितांना वाद न घालता तेथून निघून जाण्याची विनंती केली. यादरम्यान संतप्त झालेल्या संशयितांनी पोलिसांशीच हुज्जत घालण्यास सुरुवात करत "तुमची बदली करून देऊ' अशी धमकी देत संशयितांनी पोलिसांवर थेट हल्ला केला.

रुग्णालयातील एक जखमी इसम वाहनात बसवत असताना संशयितांनी त्यावर हल्ला केला. चौघांनी मिळून पोलिस कर्मचाऱ्यांना लाथाबुक्क्यांनी बेदम मारहाण करण्यास सुरुवात केली. या प्रकरणी पोलिसांना मारहाण प्रकरणी चारही संशयितांविरुद्ध विविध कलमान्वये गुन्हा दाखल केला असून 3 आरोपींना पोलिसांनी ताब्यात घेतले आहे, तर 1 आरोपी सध्या फरार असून त्याचा देखील शोध पोलीस घेत आहेत.