- चेतन व्यास
Wardha Crime News : सायबर चाेरट्यांनी वर्धा नागरी बँकेची (wardha nagari sahakari adhikosh bank) येस बॅंकेची युटिलीटी हॅक करुन तब्बल १ कोटी २१ लाख १६ हजार रुपयांच्या रक्कमेवर डल्ला मारला आहे. ही रक्कम विविध खात्यात परस्पर पद्धतीने वळवली गेल्याचे सांगितले जात आहे. या सायबर हल्ला प्रकरणी बॅंकेने पाेलिसांत तक्रार नाेंदवली आहे. वर्धा शहर पाेलिस घटनेचा कसून तपास करीत आहेत. (Maharashtra News)
वर्धा नागरी सहकारी अधिकोष बॅंक ही वर्धा जिल्ह्याची एक नावाजलेली बॅंक असून अनेक नागरिकांची बॅंक खाती वर्धा नागरी बॅंकेत आहेत. मात्र, बॅंकेकडे निफ्टी व आरटीजीएस व्यवहाराची सुविधा नसल्याने वर्धा नागरी बॅंकनेने येस बॅंकेशी संलग्नता घेतली आहे. येस बॅंकेतील खात्यातून वर्धा नागरी बॅंकेचे आरटीजीएस व निफ्टीचे व्यवहार होत असतात.
२४ मे रोजी बुधवारी बॅंक बंद असताना पहाटे ६ ते सकाळी ८ या वेळेत येस बॅंकेची युटिलीटी सायबर चाेरट्यांनी हॅक करुन पैस लुटले. यामध्ये वर्धा नागरी बॅंकेच्या खात्यातून तब्बल १ कोटी २१ लाख १६ हजारांची रक्कम विविध खात्यात वळती केली. सकाळी बॅंक उघडल्यावर सर्व संगणक सुरु करुन तपासणी केली असता कर्मचाऱ्यांना ही बाब लक्षात आली.
सायबर चाेरट्यांनी सकाळी ६.०७ ते ८.२६ मीनिटांपर्यंत एकूण २४ विविध खात्यात ही रक्कम वळती केल्याचे दिसले. मात्र, याच्या नोंदी कोअर बॅंकींग प्रणालीत दिसून आल्या नसल्याने येस बॅंकेची युटिलीटी हॅक करुन वर्धा नागरी बॅंकेच्या खात्यातील रक्कम सायबर चाेरट्यांनी वळती केल्याचे समजले.
याप्रकरणी बॅंकेचे मुख्य कार्यकारी अधिकारी कांचन अनिल केळकर यांनी याबाबतची तक्रार वर्धा शहर पोलिसात नोंदविली. पोलिसांनी गुन्हा दाखल केला असून पुढील तपास सायबर सेलच्या माध्यमातून केला जात आहे.
Edited By : Siddharth Latkar
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.
