पत्र्याचं घर, आर्थिक परिस्थिती हलाखीची; मजुराचा मुलगा IPS झाला, राज्यभरातून कौतुकाचा वर्षाव

अक्षय शिंदे, साम टीव्ही

UPSC परीक्षेचा निकाल दोन दिवसांपूर्वी जाहीर झाला. जालना येथील एका सालगड्याच्या मुलाने यश संपादन करत आपल्या आई वडिलांचे स्वप्न पूर्ण केले आहे. जालना जिल्ह्यातल्या भोकरदन तालुक्यातल्या जळगाव सपकाळ येथे राहणाऱ्या एका मजुराच्या मुलाने UPSC परीक्षेत उतीर्ण होत IPS पदाला गवसणी घातली आहे. 26 वर्षाच्या भिकन रोजेकर याने केंद्रीय लोकसेवा आयोगाच्या परीक्षेमध्ये 812 क्रमांकावर उत्तीर्ण झाला आहे. अतिशय कष्टातून शिकवणाऱ्या आई-वडिलांचे स्वप्न त्याने पूर्ण केले. भिकनच्या या यशामुळे तो राहत असलेल्या पत्र्याच्या शेडमध्ये मोठा आनंद उत्सव पाहायला मिळतोय.

भिकनचे प्राथमिक शिक्षण हे गावातच झाले असून महाविद्यालयिन शिक्षणासाठी त्याने छत्रपती संभाजीनगर गाठलं घरच्या हलाखीच्या परिस्थितीमुळे एका NGO च्या माध्यमातून त्यांनी दिल्ली येथे राहून यूपीएससीचा (UPSC) अभ्यास केला, त्याला अनेक वेळा अपयश आले. मात्र सहाव्या प्रयत्नात त्याने अखेर हे यश संपादन केलंच.

भिकनचे वडील जगन रोजेकर यांनी दुसऱ्याच्या शेतात राबून भिकनच्या शिक्षणाचा खर्च पूर्ण केला. दरम्यान आई-वडिलांचे अपार कष्टाने आपल्याला प्रेरित केलं. मित्र आणि नातेवाईकांनी यासाठी आपल्याला साथ दिल्यामुळे आपण हे यश मिळवल्याचं भिकनने म्हटले आहे.

अनेकजण हे पैसे नाही, परिस्थिति खराब, आणि नशिबाला दोष देत शिक्षणाकडे दुर्लक्ष करतात. मात्र जिद्द, चिकाटी आणि शिकण्याची धमक असेल तर यश हे दूर नाही हे भिकनने दाखवून दिले.