Bacchu Kadu :...तर पालकमंत्र्यांच्या गाड्या फोडू; बच्चू कडू असे का म्हणाले?

संजय सूर्यवंंशी, साम टीव्ही

नांदेड : पुरामुळे नुकसान झालेले शेतकरी सरकारच्या आर्थिक मदतीची वाट पाहत आहेत. फडणवीस सरकारनेही दिवाळी आधी शेतकऱ्यांना आर्थिक मदत देणार असल्याचे जाहीर केले आहे. सरकारच्या आर्थिक मदतीची शेतकऱ्यांना आस लागली आहे. ऐन दिवळील आर्थिक संकटात सापडेल्या शेतकऱ्यांसाठी माजी मंत्री बच्चू कडू धावून आले आहेत. शेतकऱ्यांसाठी 21, 22 तारखेपर्यंत सोयाबीन खरेदी केंद्र सुरू न केल्यास पालकमंत्र्यांच्या गाड्या फोडू, अशा शब्दात माजी मंत्री बच्चू कडू यांनी इशारा दिला आहे.

बच्चू कडू आज नांदेडच्या दौऱ्यावर आहेत. या दौऱ्यादरम्यान बच्चू कडू यांनी माध्यमांशी संवाद साधताना राज्यातील विविध घडामोडींवर भाष्य केलं.बच्चू कडू म्हणाले, शेतकऱ्यांची दिवाळी अंधारात जाऊ देणार नाही अशा बऱ्याच गोष्टी मी ऐकतो. शेतकऱ्यांचे आयुष्यच अंधारात आहे. दिवाळीचा काय विषय आहे. फडणवीस साहेब म्हणतात, सगळ्यांना एकरी पाच-सहा हजार रुपये देणार आहोत. मला फडणवीस यांना प्रश्न विचारायला पाच-सहा हजारात दिवाळी कशी साजरी होईल'.

'तुमची दिवाळी दोन लाखाचे फटाके फोडून साजरी करतात. शेतकऱ्यांची दिवाळी पाच हजार रुपयात साजरी होईल. थोडी-थोडी लाज वाटली पाहिजे. लाज असेल तर, असली तर वाटेल. महाराष्ट्रात अजूनही सोयाबीनचे खरेदी केंद्र सुरू केले नाहीत. मध्य प्रदेश आणि छत्तीसगडमध्ये सुरू झाले. महाराष्ट्रात का नाही? आमदार, खासदार, पालकमंत्री, अधिकाऱ्यांची मस्त मजा सुरू आहे.

'दिवाळीची सुट्टी काढून सगळे पळाले. कापसाची खरेदी कधी सुरू करणार आहात. सोयाबीनची खरेदी कधी सुरू करणार आहात. पंजाबच्या शेतकऱ्यांचा 90 टक्के शेतीमाल खरेदी होतो. हमीभावात आमचा सहा टक्के पण होत नाही. 21, 22 तारखेपर्यंत खरेदी केंद्र सुरू केले नाही, तर जिल्हाधिकारी आणि पालकमंत्र्यांच्या कार्यालयात धिंगाणा केल्याशिवाय राहणार नाही. ते ऑफिस तोडून फोडून टाकू. पालकमंत्र्यांच्या गाड्या फोडू. खरेदी केंद्र सुरू न केल्याने शेतकरी मरत आहेत. या शेतकऱ्याला मारण्याची व्यवस्था केली आहे. फक्त तलवार चालवलेली दिसत नाही, असेही ते म्हणाले.