Ganesh Chaturthi Moon: गणेश चतुर्थीच्या दिवशी चंद्राला का पाहू नये? जाणून घ्या यामागील कारण

हिंदू धर्मात गणेश चतुर्थीला खूप महत्वाचं स्थान आहे. यावर्षी हा उत्सव २७ ऑगस्टपासून सुरू होऊन अनंत चतुर्दशीला संपणार आहे. दहा दिवस चालणारा हा उत्सव भक्तांसाठी खूप आनंदाचा असतो. बाप्पा घरी येण्यासाठी लोक वर्षभर वाट बघतात. दरम्यान गणेश चतुर्थीच्या दिवशी चंद्र बघणं वर्ज्य मानलं गेलं आहे. असं मानलं जातं की, जर एखाद्यानं या दिवशी चंद्र पाहिला, तर त्याच्यावर खोटा आरोप किंवा कलंक लागू शकतो.

गणेश चतुर्थीला चंद्र का पाहू नये?

पौराणिक कथेनुसार, एकदा गणेशजी आपल्या वाहन उंदरावर बसून फिरत होते. अचानक उंदीर काहीतरी अडथळ्याला धडकला आणि त्याचा तोल गेला. त्यामुळे गणेशजी खाली पडले. हे पाहून चंद्रदेव मोठ्याने हसू लागले. त्यावेळी गणेशजींना हे अजिबात आवडलं नाही. रागावून त्यांनी चंद्राला शाप दिला की, "आजपासून जो कुणी गणेश चतुर्थीच्या दिवशी तुला पाहील, त्याच्यावर खोटा आरोप लागेल."

भगवान श्रीकृष्णावरही लागला खोटा आरोप

असं सांगितलं जातं की, एकदा भगवान श्रीकृष्णांनीसुद्धा गणेश चतुर्थीच्या दिवशी चुकून चंद्र पाहिला. त्यानंतर त्यांच्यावर स्यमंतक मणी चोरीचा खोटा आरोप लावण्यात आला. श्रीमद्भागवत कथेत याचा उल्लेख आहे. त्या आरोपातून मुक्त होण्यासाठी कृष्णाला खूप प्रयत्न करावे लागले.

संकष्टी चतुर्थीला चंद्रदर्शन आवश्यक

गणेश चतुर्थीला चंद्र पाहणं टाळावं लागतं, पण याउलट संकष्टी चतुर्थीला चंद्रदर्शनाशिवाय व्रत पूर्ण होत नाही. त्या दिवशी चंद्राला अर्घ्य देणं आणि दर्शन करणं हे महत्वाचं मानलं जातं.

चुकून गणेश चतुर्थीला चंद्र पाहिला तर काय करावे?

जर कोणी गणेश चतुर्थीच्या दिवशी चुकून चंद्र पाहिला, तर त्या दोषाचा प्रभाव कमी करण्यासाठी हे उपाय सांगितले जातात –

• भगवान कृष्णाच्या नावाचा जप करावा.

• गणपतीचं व्रत करावं.

• "सिंह: प्रसेन मण्वधीत् सिंहो जाम्बवता हतः।

  सुकुमार मा रोदीः तव ह्येषः स्यमन्तकः।।"

  हा मंत्र म्हटला पाहिजे.

(Disclaimer - या ठिकाणी दिलेली माहिती शास्त्रावर आधारित असून ती केवळ माहितीसाठी दिली जात आहे. आम्ही या गोष्टींना दुजोरा देत नाही. कोणताही उपाय करण्यापूर्वी संबंधित विषयातील तज्ज्ञांचा सल्ला अवश्य घ्या.)