Chest Pain Symptoms: छातीत सतत चमक-जळजळ होण्याचे कारण काय? असू शकतो 'या' आजाराचा धोका, तज्ज्ञांनी दिली माहिती

छातीचे दुखणे हे सगळ्यांसाठी धक्कादायक आणि इतर सामान्य आजारांपेक्षा गंभीर असते. त्यात थंडीच्या दिवसात शरीरातील रक्त गोठण्याच्या समस्या मोठ्या प्रमाणात जाणवू शकतात. मात्र छातीत चमका मारणे, जळजळ होणे ही समस्या नसून फुफ्फुसाच्या कॅन्सरचे (lung cancer) लक्षण असू शकते. बहुतेक वेळा स्ट्रेस, आम्लपित्त किंवा सीझनल अस्थमा म्हणून दुर्लक्ष केले जाणारे हे लक्षण फुफ्फुसाच्या कर्करोगाचे सुरुवातीचेच संकेत असू शकतात, असा इशारा एक नामांकित कॅन्सर स्पेशॅलिस्ट यांनी दिला.

Indiatoday.in ला दिलेल्या मुलाखतीत HCG कॅन्सर हॉस्पिटल, कोलकत्ता येथील सीनियर कन्सल्टंट, रेडिएशन ऑनकोलॉजी विभागाचे डॉ. अभिजीत दास यांनी फुफ्फुसाच्या कॅन्सरचे अनेक रुग्ण उशिरा का निदान होतात आणि कोणती लक्षणे तातडीने तपासण्याची गरज असते याबद्दल माहिती दिली.

तज्ज्ञांच्या मते, छातीतील अस्वस्थता अनेक रुग्ण साध्या समस्या समजून दुर्लक्षित करतात. फुफ्फुसाच्या कर्करोगामुळे होणारी छातीतली वेदना सतत, खोल आणि वेळ जसजसा जातो तशी वाढणारी असते. ही वेदना ताणामुळे होणाऱ्या घट्टपणासारखी किंवा आम्लपित्तामुळे होणाऱ्या जळजळीप्रमाणे नसते असे ते सांगतात. ही वेदना शांत बसल्यावर किंवा अँटासिड घेतल्यावरही कमी होत नाही, हेच तिचे वेगळेपण आहे. अनेक रुग्ण श्वास घेण्यावर, झोपेत किंवा दैनंदिन कामात अडथळा येऊ लागल्यावरच डॉक्टरांकडे जातात, तेव्हा आजार बऱ्यापैकी वाढलेला असतो.

फुफ्फुसाच्या कर्करोगाची सुरुवातीची अवस्था जवळपास सामान्य असते. लवकरच्या टप्प्यात श्वास घ्यायला त्रास जाणवत नाही, असे डॉ. दास स्पष्ट करतात. कारण छोटे ट्यूमर श्वसनमार्ग अडवत नाहीत. त्यामुळे भारतात कमी स्क्रीनिंगमुळे अनेक रुग्णांचे निदान उशिरा होते.

छातीतील वेदनेची काही स्वरूपं विशेष लक्ष देण्यासारखी आहेत. खोल श्वास घेतल्यावर वाढणारी वेदना फुफ्फुसाभोवतालच्या आवरणात सूज किंवा इन्फ्लेमेशन दर्शवू शकते. खोकल्याने किंवा हसल्याने वाढणारी वेदना फुफ्फुसाशी संबंधित असेल अशी शक्यता अधिक असते. रात्री वाढणारी वेदना किंवा झोपताना त्रास देणारा दाब, खांदा किंवा पाठीपर्यंत जाणारी टोचणी ही लक्षणे काही आठवडे टिकली किंवा वाढली तर तातडीने तपासणी करणे आवश्यक आहे.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.