Stomach cancer: पोटात कॅन्सरची गाठ तयार होण्यापूर्वी दिसतात 'हे' संकेत; सामान्य लक्षणं समजण्याची चूक करू नका

आजकाल चुकीच्या जीवनशैलीमुळे अनेक आजार आपल्या मागे लागतात. यामध्ये कॅन्सरचं प्रमाण देखील वाढताना दिसतंय. यातीलच एक कॅन्सर म्हणजे पोटाचा कॅन्सर. पोटाचा कॅन्सर एक अशी समस्या आहे जी तुमच्या शरीरात हळू-हळू वाढू लागते. त्यामुळे अगदी सुरुवातीच्या काळात तो समजणं शक्य होत नाही.

पहिल्यांदा काय दिसून येतात लक्षणं

या आजाराच्या सुरुवातीला गॅस, एसिडीटी तसंच अपचन अशा समस्या दिसून येतात. या समस्या इतर आजारांच्या लक्षणांप्रमाणे असल्याने अनेकदा त्याकडे दुर्लक्ष केलं आहे. परिणामी यामुळे कॅन्सरची गाठ वाढण्याचा धोका अधिक असतो. अशा परिस्थितीत कॅन्सरची गाठ वाढून त्यावर उपचार करणंही कठीण होऊन बसतं.

मात्र कोणताही आजार होण्यापूर्वी शरीर आपल्याला त्याचे संकेत देत असतं. अशावेळी पोटाच्या कॅन्सरची गाठ शरीरात तयार होण्यापूर्वी तुम्हाला काही प्रकारचे संकेत मिळतात. हे संकेत कोणते आहेत ते जाणून घेऊया.

पोटात जळजळ

पोटात कॅन्सरची गाठ तयार होत असताना सुरुवातील अपचन, पोटात जडपणा किंवा वेदना या समस्यांचा सामना करावा लागतो. जर व्यक्तीला सतत असा त्रास होत असेल आणि सोबत पोटात जळजळ किंवा गॅसचा त्रास होत असेल तर हे एक लक्षणं मानलं जातं.

पोटात सतत मळमळ

जर तुम्हाला सतत पोटात मळमळ किंवा उल्टी होण्याचा त्रास होत असेल तर सावध व्हा. यासोबतच उल्टी झाल्यानंतर त्यामध्ये रक्त दिसून येत असेल तर हे पोटात कॅन्सरची गाठ होण्याचं लक्षणं मानलं जातं. याचा अर्थ पोटाच्या आतील बाजूला काही गंभीर बदल होत असल्याचे संकेत असतात. याचा संबंध पोटाच्या कॅन्सरशी देखील जोडला जातो.

थकवा आणि अशक्तपणा

कॅन्सरची गाठ तयार होण्यापूर्वी सतत व्यक्तीला थकवा जाणवू शकतो. पण आराम करूनही हा थकवा जात नसेल तर हे लक्षण गंभीर मानलं जातं. याचा अर्थ तुमच्या शरीराला पुरेशा प्रमाणात पोषक तत्त्व मिळत नाहीये. जर दीर्घकाळ तुम्हाला थकवा वाटत असेल तर डॉक्टरांचा सल्ला घेणं आवश्यक आहे.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.