वाढत्या वयानुसार आपल्या शरीरात अनेक बदल होत असतात. यामध्ये एक दिसणारा बदल म्हणजे केस पांढरे होणं...सामान्यपणे आपण याला केस पिकणं असं म्हणतो. मात्र आजकाल केवळी प्रौढ किंवा वयस्कर व्यक्ती नव्हे तर तरूणांचे केसही पिकलेले दिसतात.
अशावेळी अनेकजण पिकलेले केस काढून टाकतात. कदाचित तुम्हीही असं केलं असेल. तर काहींच्या मनात भीती असते की, पांढरे केस काढल्याने त्याचं प्रमाण वाढतं. मात्र खरंच असं होतं का? हे आज आपण जाणून घेणार आहोत.
एक पांढरा केस उपटला तर त्याजागी अनेक पांढरे केस येतात, हा समज आजही अनेकांच्या मनात कायम आहे. पण तज्ज्ञांच्या मते, हा फक्त गैरसमज असून त्यामागे कोणताही सायंटीफिक आधार नाही.
आपल्या केसांचा रंग हा मेलानिन नावाच्या रंगद्रव्यामुळे ठरतो. हे मेलानिन केसांच्या फॉलिकल्समध्ये तयार होत असतं. वय वाढल्यावर किंवा काही कारणांमुळे मेलानिनचं प्रोडक्शन कमी झालं की केस हळूहळू पांढरे किंवा करडे दिसू लागतात.
तज्ज्ञ सांगतात की, एक पांढऱ्या केस उपटल्याने त्याच्या आजूबाजूच्या फॉलिकल्सवर कोणताही परिणाम होत नाही. म्हणजेच तुम्ही एक केस उपटला, तरी त्याच जागी पुन्हा एकच केस उगवतो. त्यामुळे एक केस उपटला की अनेक केस पांढरे होतात ही केवळ पिढ्यान् पिढ्या चालत आलेली समजूत सायन्सच्या दृष्टीने चूक आहे.
पांढरे केस दिसू नयेत म्हणून अनेकजण ते लगेच उपटतात. पण हे सवयीचं झाल्यास टाळूच्या आरोग्यावर त्याचा वाईट परिणाम होऊ शकतो. सतत केस उपटल्याने केस पातळ होणं, टाळूवर डाग किंवा जखमा तयार होणं अशा तक्रारी उद्भवतात.
जर काही पांढरे केस तात्पुरते लपवायचे असतील तर बाजारात मिळणारे हेअर टच-अप मस्कारा किंवा पेन वापरता येऊ शकतं. याशिवाय टेम्पररी रूट पावडर किंवा स्प्रेचाही वापर करून ग्रे रूट्स सहज झाकता येतात.