Diwali Abhyang Snan : दिवाळीच्या पहाटे किती वाजता करावे अभ्यंगस्नान? जाणून घ्या शुभ मुहूर्त, तारीख अन् योग्य पद्धत

दिवाळी हा प्रकाशाचा आणि आनंदाचा सण आहे. दिवाळीच्या पहिल्या दिवशी अभ्यंगस्नान करण्याची प्रथा आहे. दिवाळीतील नरक चतुर्दशीच्या दिवशी पहाटे लवकर उठून शरीराला तेल आणि उटणे लावून स्नान करण्याची परंपरा आहे. या स्नानामुळे शरीराची शुद्धी होते आणि नवीन उत्साहाने सणाची सुरुवात होते, अशी धार्मिक श्रद्धा आहे.२०२६ मध्ये नरक चतुर्दशी आणि लक्ष्मीपूजन एकाच दिवशी आले आहे. त्यामुळे यंदा अभ्यंगस्नान नेमके कधी करायचे, त्याचा शुभ मुहूर्त कोणता, स्नानाची पद्धत जाणून घेऊयात.

अभ्यंगस्नान शुभ मुहूर्त कधी?

२०२६ मध्ये नरक चतुर्दशीचे अभ्यंगस्नान रविवार, ८ नोव्हेंबर २०२६ रोजी केले जाणार आहे. याच दिवशी संध्याकाळी लक्ष्मीपूजनही केले जाईल. चतुर्दशी तिथी ७ नोव्हेंबर रोजी सकाळी सुरू होऊन ८ नोव्हेंबर रोजी सकाळी समाप्त होणार आहे.

• मुंबई - पहाटे ५:४५ ते सकाळी ६:४२

• पुणे - पहाटे ५:४० ते सकाळी ६:३७

• नागपूर - पहाटे ५:२२ ते सकाळी ६:२०

• नाशिक - पहाटे ५:४२ ते सकाळी ६:४०

• छत्रपती संभाजीनगर - पहाटे ५:३६ ते सकाळी ६:३३

• कोल्हापूर - पहाटे ५:३६ ते सकाळी ६:३४

अभ्यंगस्नान म्हणजे काय?

अभ्यंगस्नान म्हणजे स्नानापूर्वी संपूर्ण शरीराला तेल लावून मालिश करणे आणि त्यानंतर उटणे लावून स्नान करणे. दिवाळीच्या नरक चतुर्दशीला पहाटे हे स्नान करण्याची विशेष परंपरा आहे.या दिवशी प्रामुख्याने तीळ तेलाचा वापर केला जातो. त्यानंतर सुगंधी उटणे लावून कोमट पाण्याने स्नान केले जाते. धार्मिक मान्यतेनुसार या स्नानामुळे पापांचा नाश होतो आणि शरीर व मनाची शुद्धी होते.

अभ्यंगस्नान कसे करावे?

अभ्यंगस्नानासाठी पहाटे लवकर उठून सर्वप्रथम घरात दिवा लावावा. त्यानंतर शरीराला तीळ तेल किंवा अभ्यंग तेल लावून हलक्या हाताने मालिश करावी. काही वेळ तेल शरीरावर राहू द्यावे. त्यानंतर पारंपरिक उटणे किंवा बेसनाचे मिश्रण शरीराला लावावे. कोमट पाण्याने संपूर्ण शरीर स्वच्छ धुवावे. स्नान झाल्यानंतर स्वच्छ किंवा नवीन कपडे परिधान करावेत. देवघरात दिवा लावून भगवान श्रीकृष्णाचे स्मरण करावे आणि कुटुंबासोबत दिवाळीचा आनंद साजरा करावा.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं कुठलेही समर्थन अथवा दावा करत नाही.