Kiran Mane In Politics: अभिनेते किरण मानेंची राजकारणात एन्ट्री; उद्धव ठाकरेंच्या उपस्थितीत हाती बांधणार शिवबंधन

Kiran Mane In Politics

सेलिब्रिटी मंडळींचं आणि राजकारणाचं एक घनिष्ठ नातं आहे. असे अनेक सेलिब्रिटी आहेत त्यांनी राजकारणात एन्ट्री घेत स्वत:ची एक वेगळी प्रतिमा तयार केली आहे. मराठी सेलिब्रिटींसह अनेक बॉलिवूड अभिनेते आणि अभिनेत्री राजकारणात आहे. गेल्या काही दिवसांपूर्वी महाराष्ट्रात अनेक सेलिब्रिटींनी राजकारणामध्ये एन्ट्री केली. अशातच आता आणखी एक मराठमोळा अभिनेता राजकारणामध्ये येतोय. बिग बॉस फेम अभिनेते किरण माने आज शिवसेना उद्धव बाळासाहेब ठाकरे गटात प्रवेश करणार आहेत. (Marathi Actors)

किरण माने कायमच सोशल मीडियावर सक्रिय असतात. सोशल मीडियाच्या माध्यमातून सामाजिक, राजकीय आणि सिनेसृष्टीतील मुद्द्यांवर ते भाष्य करण्याचा प्रयत्न करत असतात. कायमच सोशल मीडियावर आपल्या पोस्टमुळे चर्चेत राहणारे किरण माने राजकारणात प्रवेश करणार असल्यामुळे त्यांची सोशल मीडियावर बरीच चर्चा होत आहे. अभिनेते किरण माने आज हाती शिवबंधन बांधणार आहे. शिवसेना उद्धव ठाकरे गटात ते आज प्रवेश करणार आहेत. उद्धव ठाकरे यांच्या उपस्थितीत त्यांचा हा पक्षप्रवेश होणार आहे.

उद्धव ठाकरे यांच्या उपस्थितीत मातोश्रीवर हा पक्षप्रवेश पार पडणार असून यावेळी बीडसह, मराठवाड्यातील काही कार्यकर्तेही पक्षप्रवेश करणार आहेत. किरण माने यांनी भाजप विरोधी भूमिका घेतल्यामुळे एका मालिकेतूनही त्यांना काढून टाकण्यात आलं होतं.

आता ठाकरे गटाच्या प्रवक्त्या आणि नेत्या सुषमा अंधारे यांच्या माध्यमातून किरण माने ठाकरे गटात प्रवेश करणार आहेत. यापूर्वी ही अनेक सेलिब्रिटींनी राजकारणात प्रवेश केला आहे.

खासदार अमोल कोल्हे, गायक आनंद शिंदे, अभिनेत्री प्रिया बेर्डे, मेघा धाडे, हार्दिक जोशी, अक्षया देवधर, प्रभाकर मोरे, गार्गी फुलेसह अनेक सेलिब्रिटींनी राजकारणात प्रवेश केला. (Entertainment News)