Crime News: सुट्टी नाकारल्याने सुरक्षारक्षकाचं डोकं सटकलं; बँक मॅनेजरच्या छाती घातली गोळी

उत्तर प्रदेशातील गाझियाबाद जिल्ह्यातील लोनी बॉर्डर पोलीस ठाणे हद्दीत धक्कादायक घटना घडली. सुट्टी नाकारल्यानं एका सुरक्षारक्षकाने आपल्या मॅनेजरचा जीव घेतला आहे. येथील पंजाब अँड सिंध बँकेच्या शाखेत तैनात असलेल्या सुरक्षा रक्षकाने बँक मॅनेजरवर गोळी झाडून त्यांची हत्या केली. गोळीबारानंतर आरोपी रक्षक घटनास्थळावरून फरार झाला आहे.

हाती आलेल्या माहितीनुसार सुरक्षारक्षक बहुतेकवेळा कोणालाही न कळवता रजा घेत असायचा. आज बँक मॅनेजरने त्याला रजा देण्यास नकार दिला होता, त्याचा राग आल्यानंतर सुरक्षारक्षकाने मँनेजरवर गोळी झाडली. बलराम नगर येथील पंजाब अँड सिंध बँकेच्या शाखेत घडली. रवींद्र हुड्डा, असं सुरक्षारक्षकाचे नाव आहे. तर अभिषेक शर्मा असं मॅनेजरचे नाव आहे. रवींद्र हुड्डा हा बँक मॅनेजरचा केबिनमध्ये गेला आणि आपल्या बंदुकीतून थेट मॅनेजरच्या छातीत गोळी घातली.

गोळीबाराचा आवाज ऐकताच बँकेत काम करणारे इतर कर्मचारी घाबरून गेले. मात्र कोणाला काही कळण्याआधीच आरोपी रक्षक रवींद्र हुड्डा तेथून पळून गेला होता. गोळी लागल्याने गंभीर जखमी झालेल्या मॅनेजर अभिषेक शर्मा यांना इतर कर्मचाऱ्यांनी रुग्णालयात नेले. मात्र उपचारादरम्यान त्यांचा मृत्यू झाला.

लोणी बॉर्डर पोलीस स्टेशन परिसरातील बलराम नगर कॉलनीच्या मुख्य रस्त्यावर पंजाब अँड सिंध बँकेची शाखा आहे. मूळ बिहारमधील पाटणा येथील लखीपूर येथील ३५ वर्षीय अभिषेक कुमार दिल्ली ९९ सोसायटीमध्ये राहत होते. तो लोणीतील बलराम नगर कॉलनी येथील पंजाब अँड सिंध बँकेच्या शाखेचा मॅनेजर होता.

बागपत जिल्ह्यातील रहिवासी रवींद्र हुड्डा हा बँकेच्या शाखेत सुरक्षा रक्षक म्हणून नोकरी करत होता. आरोपी सुरक्षा रक्षक रवींद्र हुड्डा हा बागपत जिल्ह्याचा रहिवासी आहे. गेल्या काही दिवसांपासून त्याचे आणि बँक मॅनेजरसोबत रजेवरून वाद होत होते. सोमवारी दुपारी १ वाजण्याच्या सुमारास सुरक्षा रक्षक बँकेत गेला, तेव्हा त्याच्याकडे परवानाधारक बंदूक होती. तो बंदूक घेऊनच मॅनेजरच्या केबिनमध्ये गेला होता. रजेवरून मॅनेजर आणि सुरक्षारक्षक यांच्या चर्चा सुरू होती, तेव्हा ब्रॅच मॅनेजरनं त्याला रजा देण्यास नकार दिला. तेव्हा संतापलेल्या गार्डने बँक व्यवस्थापकाच्या छातीत गोळी झाडली.