Mumbai Crime: कॉमन बाथरूममध्ये जायचा, महिलांचे गुपचूप VIDEO काढायचा; मोबाइल पाहून पोलिसही हादरले

बाथरूममध्ये लघुशंकेसाठी जाणाऱ्या महिलांचे लपूनछपून व्हिडीओ शूट करणाऱ्या तरुणाला मुंबई पोलिसांनी अटक केली आहे. मुंबईच्या भुलेश्वरमधील एका इमारतीमध्ये ही धक्कादायक घटना घडली. या प्रकरणी तरुणाविरोधात गुन्हा दाखल करत पोलिसांनी त्याला अटक केली. या तरुणाचा मोबाइल पोलिसांनी जप्त केला. हा मोबाइल पाहून पोलिसही चक्रावले.

मिळालेल्या माहितीनुसार, मुंबईतील भुलेश्वरच्या जय हिंद इस्टेट इमारतीमध्ये हा धक्कादायक प्रकार घडला आहे. या घटनेमुळे भुलेश्वरमध्ये खळबळ उडाली. इमारतीच्या कॉमन बाथरूममध्ये आरोपी तरुण जायचा आणि तो लघुशंका करताना महिला आणि अल्पवयीन मुलींचे लपून व्हिडीओ आपल्या मोबाइलमध्ये काढायचा. या १९ वर्षीय तरुणाला लोकमान्य टिळक मार्ग पोलिसांनी अटक केली.

राजनकुमार चौपाल असं आरोपी तरुणाचे नाव आहे. हा तरुण मुळचा बिहारच्या मधुबनमध्ये राहणारा आहे. अटकेनंतर पोलिसांनी या तरुणाचा मोबाइल ताब्यात घेतला. त्याचा मोबाइल पाहून पोलिसांना मोठा धक्का बसला कारण त्याच्या मोबाइलमध्ये ८ व्हिडीओ सापडले. त्याने काही महिला आणि अल्पवयीन मुलींचे लघुशंका करताचे व्हिडीओ आपल्या मोबाइलमध्ये शूट केले होते.

पोलिसांना आरोपीच्या मोबाइलमध्ये दोन महिलांसह एका अल्पवयीन मुलीचे व्हिडिओ सापडले. या तरुणाविरोधात गुन्हा दाखल करत पोलिसांनी त्याला अटक केली आहे. राजनकुमारला भारतीय न्याय संहितेच्या कलम ७७ सह बालकांचं लैंगिक अत्याचारापासून संरक्षण कायदा म्हणजे पॉक्सोअंतर्गत गुन्हा दाखल केला आणि अटकेची कारवाई करण्यात आली.