Jalgaon Crime: जळगावात 'खुनी राजकारण'! सरपंच-उपसरपंचाला चिरडण्याचा डाव; सुपारी घेऊन अंगावर घातली पिकअप

जळगाव जिल्ह्यातील चाळीसगाव तालुक्यात खुनी राजकारणाचा खेळ खेळला गेल्याची घटना घडली आहे. चाळीसगाव तालुक्यातील दस्तकेवाडी गावातील सरपंच आणि उपसरपंच या दोघांचाही काटा काढण्यासाठी अपघाताचा बनाव घडवण्यात आल्याची बाब मेहुणबारे पोलिसांच्या तपासात उघडकीस आली आहे. राजकीय वर्चस्व आणि जुन्या वादातून या सरपंच-उपसरपंच्या अंगावर पिकअप गाडी घालून त्यांना जीवे मारण्याचा प्रयत्न झाल्याची घटना काही दिवसापूर्वी घडली होती. या प्रकरणाचा तपास करताना पोलिसांनी मुख्य सूत्रधारांसह चौघांना जेरबंद केले आहे.

पोलिसांच्या माहितीनुसार, २६ जानेवारी २०२६ रोजी प्रजासत्ताक दिनाच्या रात्री हा खूनी खेळ खेळला गेला. दस्तकेवाडीचे सरपंच भगवान उत्तम देवरे आणि उपसरपंच ईश्वर ऊर्फ भैय्या लक्ष्मण अहिरे हे दोघे आपल्या बुलेट या दुचाकीवरून चाळीसगावहून गावाकडे जात होते. शिरवाडे शिवारात मेहुणबारे ते शिरवाडे रस्त्यावर समोरून येणारी एक भरधाव पिकअपने त्यांच्या बुलेटला जाणीवपूर्वक जोरदार धडक दिली. या धडकेत सरपंच देवरे गंभीर जखमी झाले. सुरुवातीला हा सामान्य रस्ता अपघात असल्याचे भासवण्यात आले.

या घटनेत उपसरपंच ईश्वर अहिरे यांना घातपाताचा दाट संशय आला. त्यांनी पोलीस प्रशासनाकडे याप्रकरणाचा तपास करण्याची मागणी केली. त्यानंतर पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर आणि डीवायएसपी विजयकुमार ठाकूरबाड यांनी तपासाचे आदेश दिले. सहायक पोलीस निरीक्षक प्रवीण दातरे यांनी सीसीटीव्ही फुटेज तपासले. त्यानंतर तांत्रिक माहितीचे विश्लेषण करत तपास केला. त्यात एक धक्कादायक बाब उघडकीस आली एक पिकअप वाहन बराच वेळेपासून त्या दोघांचा पाठलाग करत असल्याचं दिसून आले.

पोलिसांनी संशयास्पद पिकअप वाहनाचा मालक लक्ष्मण अशोक महाजन याला ताब्यात घेतलं आणि त्यानंतर त्याला खाक्या दाखवताच. त्यावेळी त्याने या घटनेचा धक्कादायक खुलासा केला. दस्तकेवाडी गावातील राजकीय मतभेदातून सरपंच आणि उपसरपंचांची हत्या करण्याचा कट भिमराव रोकडे आणि इतरांनी रचल्याचा खुलासा केला. त्यानंतर पोलिसांनी तात्काळ कारवाई करत या प्रकरणातील सर्व मुख्य आरोपींना बेड्या ठोकल्या. भिमराव पांडुरंग रोकडे (रा. दस्तकेवाडी), सचिन भिमराव रोकडे (रा. दस्तकेवाडी), गोविंदा विठोबा माळी (रा. दस्तकेवाडी), लक्ष्मण अशोक महाजन (पिकअप मालक, रा. वाडे, ता. भडगाव) यांना हत्येच्या कटाप्रकरणी अटक करण्यात आली आहे.