होळीच्या दिवशी रक्ताचा सडा; तीन मित्रांवर गोळ्या झाडल्या, दोघांचा जागीच मृत्यू

होळीच्या दिवशी रक्ताचा सडा सांडला आहे. बिहारच्या नवगछिया भागात भयंकर घटना घडली आहे. नवगाछियामध्ये बुधवारी रात्री तीन तरुणांवर गोळीबार झाल्याची घटना घडली. यात दोन जणांचा जागीच मृत्यू झाला आहे. तर एक तरुण गंभीर जखमी झाला आहे. जखमी तरुणाला तातडीने पुढील उपाचारासाठी भागलपूरच्या मायागंज रुग्णालयातून पटना येथे हलविण्यात आलं आहे .

गुलशन कुमार आणि धीरज कुमार अशी गोळीबारात मृत्यू झालेल्या युवकांची नावे आहेत. तर अजेश कुमार असे जखमी तरुणाचे नाव आहे. अजेशला मायागंज रुग्णालयात दाखल केले. डॉक्टरांनी प्राथमिक उपचार केल्यानंतर पटना येथील रुग्णालयात हलविण्यात आलं आहे. मिळालेल्या माहितीनुसार, दोघांचे मृतदेह शवविच्छेदनासाठी पाठवण्यात आले आहेत. गोळीबाराची घटना घडल्यानंतर घटनास्थळी एकच गर्दी झाली होती.

तिघेही मित्र होते. तिघे जण खगडिया जिल्ह्याच्या पसराहा पोलीस ठाण्यात हद्दीतील भौरकाठ गावात राहायला होते. मृत गुलशन कुमारचा भाऊ मिथलेश मंडलने सांगितले की, 'होळीच्या दिवश माझा भाऊ हा दोन मित्रांसोबत पत्नीला घेऊन सासरी गेला होता. पत्नीला सासरी सोडल्यानंतर तिघे मित्र बोरवा गावात गेले. ते सायंकाळी ४ वाजता घरातून निघाले. परंतु रात्री उशिरा देखील घरी परतले नाहीत'.

पोलिसांनी दिलेल्या माहितीनुसार, दोघे बेपत्ता झाल्याची माहिती मिळताच त्यांची शोधाशोध सुरू केली आहे. परंतु दोघेही सापडले नाहीत. काही वेळानंतर जखमी अजेश कुमारने नातेवाईकांना फोन करून माहिती दिली. त्यानंतर शुक्रवारी सकाळी ९ वाजता कलबलिया धारजवळील एका रस्त्याच्या किनाऱ्यावर दोघांचे मृतदेह सापडले. दोघांची गोळ्या झाडून हत्या का करण्यात आली, याचे कारण अद्याप स्पष्ट झालेले नाही. परंतु होळीच्या दिवशी झालेल्या गोळीबाराने परिसरात खळबळ उडाली आहे.