Crime: विवाहबाह्य संबंधाचा भयंकर शेवट, ३० वर्षीय बॉयफ्रेंडकडून महिलेची हत्या; मृतदेह जाळून टाकला

• कर्नाटकमध्ये ४३ वर्षीय विवाहित महिलेची हत्या

• आरोपी ३० वर्षीय बॉयफ्रेंडचे भयंकर कृत्य

• महिलेच्या डोक्यावर विटेने हल्ला करत जागीच संपवलं

• पुरावे नष्ट करण्यासाठी मृतदेह ब्लँकेटमध्ये गुंडाळून जाळून टाकला

कर्नाटकमध्ये महिलेची हत्या करून मृतदेह जाळून टाकण्यात आल्याची धक्कादायक घटना घडली. निर्माणाधीन इमारतीमध्ये रक्ताच्या थारोळ्यात पडलेला महिलेचा मृतदेह आढळून आल्यामुळे एकच खळबळ उडाली. या प्रकरणी पोलिसांनी कोणताही पुरावा नसताना देखील अवघ्या ३६ तासांत आरोपीला अटक केली. आरोपी महिलेचा बॉयफ्रेंड आहे. या घटनेमुळे कर्नाटकमध्ये एकच खळबळ उडाली. पोलिस सध्या आरोपीची चौकशी करत आहेत.

मिळालेल्या माहितीनुसार, कर्नाटकच्या कोप्पल जिल्ह्यातील कनकगिरी शहरात ही घटना घडली. ४३ वर्षीय महिलेची हत्या करुन आरोपीने पुरावे नष्ट करण्यासाठी तिचा मृतदेह ब्लँकेटमध्ये गुंडाळून जाळून टाकला. ही घटना ८ जूनच्या रात्री सव्वा दहा वाजताच्या सुमारास घडली. पोलिस तपासातून समोर आले की, हत्या करण्यात आलेली महिला कोप्पल जिल्ह्यातील गंगावती तालुक्यातील करातगी गावात राहणारी होती. ती महिला विवाहित होती तिचे कुश्तागी तालुक्यात राहणाऱ्या ३० वर्षीय तरुणासोबत प्रेमसंबंध सुरू होते.

घटनेच्या रात्री आरोपी तरुण महिलेला फूस लावून निर्माणाधीन घरात घेऊन गेला. त्याठिकाणी दोघांमध्ये कडाक्याचे भांडण झाले. यावेळी संतप्त झालेल्या तरुणाने महिलेच्या डोक्यावर विटेने हल्ला केला. या हल्ल्यात गंभीर जखमी झालेल्या महिलेचा जास्त रक्तस्राव झाल्यामुळे जागीच मृत्यू झाला. आरोपीने महिलेचा मृतदेह ब्लँकेटमध्ये गुंडाळून पेटवून दिला. त्यानंतर तो घटनास्थळावरून पळून गेला.

संगनगौडा मालिपाटील नावाच्या एका व्यक्तीच्या तक्रारीवरून कनकगिरी पोलिसांनी या प्रकरणी हत्या आणि पुरावे नष्ट केल्याप्रकरणी गुन्हा दाखल केला. पोलिसांनी या प्रकरणाच्या तपासासाठी अनेक पथकं तयार केली होती. तांत्रिक पुरावे आणि प्रत्यक्ष तपास करत पोलिसांनी फक्त महिलेची ओळख पटवली नाही तर आरोपीलाही अटक केली. पोलिस आरोपीची कसून चौकशी करत आहेत.