Chhatrapati Sambhajinagar: १२ कोटींसाठी कामगारांनीच रचला बड्या उद्योजकाच्या अपहरणाचा कट, एका टीपने प्लॅन फसला; व्यापारी भयभीत

छत्रपती संभाजीनगर, |ता. २१ जून २०२४

छत्रपती संभाजीनगरमध्ये १२ कोटींसाठी एका मोठ्या उद्योग समूहाच्या उद्योजकाच्या अपहरणाचा कट रचला जात असल्याचे उघडकीस आले होते. या अपहरणाच्या कटाने संभाजीनगरच्या वाळूज, शेंद्रा एमआयडीसीमधील उद्योजक भयभीत झाले आहेत. या प्रकरणी पोलीस आयुक्त संदीप पाटील यांची भेट घेऊन याबाबत कठोर कारवाई करण्याची मागणी केली आहे.

याबाबत सविस्तर माहिती अशी की, छत्रपती संभाजीनगरमध्ये एका बड्या उद्योजकाच्या अपहरणाचा कट उधळून लावण्यात पोलिसांना यश आले आहे. १२ कोटींसाठी एका बड्या व्यावसायिकाच्या अपहरणाचा कट रचला जात असल्याचे उघडकीस आल्यानंतर उद्योज जगतात एकच खळबळ उडाली आहे.

नामांकित समुहाचे व्यवस्थापकीय संचालक, उद्योगपती काही दिवसांपूर्वी जवाहरनगर भागात एका रेस्टॉरंटवर गेले होते. त्यावेळी एका तरुणाने तुमचे अपहरण करणार असल्याचे सांगितले. ही बाब ऐकताच उद्योजक पुरते घाबरून गेले. त्यांनी स्वतःच्या मोबाईलमध्ये त्याचे फोटो काढले. त्यानंतर वरिष्ठ पोलिस अधिकाऱ्यांकडे तक्रार केली.

गेल्या २० दिवसांपासून पोलिस तपास करत असलेल्या या प्रकरणात पाच दिवसांपूर्वी धक्कादायक वळण मिळाले. १२ कोटी रुपयांसाठी काही कामगारांकडून उद्योजकाच्या अपहरणाचा कट रचला जात होता शहरातील उद्योजकांनी पोलीस आयुक्तांची भेट घेऊन याबाबतची माहिती दिली. त्यानंतर पोलिस उपायुक्तांनी बैठक घेत मसिआच्या पदाधिकाऱ्यांशी चर्चा केली.

दरम्यान, वाळूज, एमआयडीसी वाळूज व चिकलठाणा एमआयडीसीच्या परिसरात गुन्हेगारीने डोके वर काढले. वाढत्या गुन्ह्यांमुळे कामगार वर्ग भयभीत असतानाच उद्योजकाच्या अपहरणाचा कट रचला जात असल्याच्या वृत्ताने उद्योग क्षेत्र हादरले.